يابـن آدم | سمو الشيخ حمدان بن محمد بن راشد آل مكتوم - فزاع

يابـن آدم

يا بــن آدم كل ما كنــت انظر الجرح العظيم

ما لقيت اعظم من جروح الندم بين الجروح

ويا بـن آدم كل ما قلت الـزعامــــه للـزعـيم

ينتشي بي كبريائـي فــوق شاهقــة الصروح

والدروب يقودها درب الصــراط المستقيـــم

واستقامات البشر بيــن الصراحه والوضوح

والغصون اللي فرحها غير لا هب النسيـــم

ما تـساءل عن معـاناة الحـمام اللــي يـنوح

يا هل الزور ان حلفتوا زور وبوجه الكـــريم

فاح ريح مْن الكذب .. والكذب له ريحٍ يفوح

يا رحيم الصدر ضايق حيل ستـــرك يا رحيم

والدروب طوال واقدامي من اللهفة جمــوح

أعطني من لدنك التوفيق والعـقل الحكـيــــم

والعزيمه ، والمعزّه ، والمراجل ، والطموح

والقمر يغريني آغنـّي على اللحـن القـديــــم

ويجـذب البـرّاق عـيني كل ما شفـته يلـــوح

والقـساوه للرجـوله .. والنعـومه للحـريــم

يا كـثر ناسٍ تجي في عـيني وناسٍ تـروح

أكثر اهل الأرض خـلاّني وانا مالي نـديـم

يشـتكون جروحهم عندي وانا كلّي جروح

تصفح بالعنوان

أرسل تعليقك

( *حقول مطلوبة )
( *حقول مطلوبة )