من عرفـته ما ذرفـته | سمو الشيخ حمدان بن محمد بن راشد آل مكتوم - فزاع

من عرفـته ما ذرفـته

من صغر سِنـّي وانا انظر للغلا نظره رفيعه

واعرف ان العِشره اسمى من غلاك وْمن حَناني

يوم شفتك من ضياع وشفتني مثل الوديعه

انته اللي ضعـت فيني وانت بس اللي لقـاني

والله انّ الضيعه اللي جابتك ما هي بْضيعه

ضيعة العـشـّاق شيّ وْضيعـتي بك شيّ ثاني

يا غرامٍ ما استطيع انساه لو قلت استطيعه

يا كــلامٍ مـن عـرفـته ما ذرفـتـه من لـساني

إشتر اللي تـشتري فيني وبيع اللي تبـيعه

ما التـفت لوجـه غـيرك باعـني والاّ شراني

خل طعـناتك قـويّه وْ خل نظراتك سـريعه

يعني اضرب اهرب اضرب اضرب اهرب في ثواني

ماانت باوّل من شرب صيفي وعطـّشني ربيعه

ولا انت بآخر من خذاني من يديّ وْلا خذاني

إنت ما وسّعت صدري لين ضيّـقت الوسيعه

كنـّك تحـطب الجروح مْن المحاني للمحاني

كل ساعه لك بصدري رمح أقسى من تبيعه

وكل جرحٍ له بوجهـي حـزن غـير الأوّلاني

وكل ليـل يْهـون لكن ليـلة البارح فـظـيـعه

يعـلـم الله كانـت اوّل لـيله تـزلـزل كـيـاني

كن رمحك ما يبات الا ورى الحدب المنيعه

وكن جرحي ما يعرف ينام ورماحك تعاني

ولّ يا كيد الظبا ما شفـت من يصنع صنيعه

لو زرعته في حشاك سنين يمحيك بثواني

في زمنـّا قالوا ان ما طاوعك هالوقت طيعه

وانت مثل الوقت قاسي طاعني والاّ عصاني

بس ابيك ليا عسفت البُعد واسرجت القطيعه

إلتـفت مَرّه عليّ وْ حـط نفـسك في مـكاني

إنت لو إنّي خدعتك راح ترضى بالخديعه ؟!

بعـتني مليـون مَرّه .. حبّـني مَرّه عشاني

خايف تحمّل خـفـوقي فوق ما لا يستـطيعه

ويبتـليك الله بغـيري مثل ما فيك ابتـلاني

خلـّني مثـل الضـياع وشلـّني مثـل الوديـعه

إنت من ضيّعتني ، مافي أحد غيرك لقاني

واشهد ان الضيعه اللي جابتك ماهي بْضيعه

ضيعة العشـّاق شيّ وْضيعتي بك شيّ ثاني

تصفح بالعنوان

أرسل تعليقك

( *حقول مطلوبة )
( *حقول مطلوبة )