هنيـّـالي | سمو الشيخ حمدان بن محمد بن راشد آل مكتوم - فزاع

هنيـّـالي

يا ناعـم العـود مزحـك يذبح وجـِدّك

يـذبـح وانا كـل ما جا منـك يـحـلالي

ألله .. ألله  يـا فـتــّــــان مـن قـــــدّك

حـتى عـيوني لوصـلك مـوقـها سـالي

باحت دموعي غـرام وْقلت وش حدّك

يا دمعـتي تـنـزليـن وْ مرقـبـك عـالي

قالـت مكـاني خلقـه الله عـلى خــدّك

والاّ عـيونـك مكـان الصـاحب الغالي

محـلاك .. محلاك قـالت للشهـد نِدّك

حتى الشهـد ما ينافـس ريقـك الحالي

أهواك ، واغـليك ، وآقـدّرك وآودّك

وآلـحـّـنـك شـوق ويـغـنـّـيـك مــوّالي

آهـد بـفـراقـك الـدنـيـا .. ولا اهــدّك

و افـني بوصـلك طـموحـاتي وآمالي

برودة الشـوق تـدفا في حـضن يـدّك

وحـرارة الوصـل تـبـرد لا تـهـيّـالي

أحـط راسـي على مـنحـرك واسـدّك

عن حـب هالـناس لانـّك حبي لحالي

قلبي يموت ف غلاك ووصلي يشدّك

وغلاك في خافقي و صورتك في بالي

ولا انثنى رمش عينك وانتصب قـدّك

أشوف لون القهـر في عيون عذّالي

ويـقـول قـلـبي هـنـيّـالك ومـن قــدّك

وانـا أردّد مَـعَ قـلـبــي .. هـنـيـّــالي

تصفح بالعنوان

أرسل تعليقك

( *حقول مطلوبة )
( *حقول مطلوبة )