مـطــــــار | سمو الشيخ حمدان بن محمد بن راشد آل مكتوم - فزاع

مـطــــــار

الحب ذلّ .. الوصل عار.. لا صار تاليها هوان

ياللّي تـقول اخبارك .. اخباري بـدون مْجاملــه

زعلان منّك.. إي نعم زعلان من شهر رْمضان

ما تـشوف جرحي لي ثـمان شهور وانا حاملــه

رغـم قـساوة جرحـك بْقـلبي لكـن قلـبي ما خان

يصحى إلى منّه صحى وان نام جرحك نام لـــه

فتـنتـني لين اكتـشـفـت ان اكـثر الحـب افـتـتان

واتعبت من مَـسْك الـقـَلم كفٍ تجـيد أنامـلـــــــه

صـياغـة الـتعبيـر في جـملـه يخـلـّده الزمـــــان

تصـويرها يـثـبت بـأنّ الـنـّاس ماهـي كـاملــــه

خلاص بطـّـلنا غـلا .. أحسن لنا نبقى اخـوان

ويعاملك قلبي طبيعي مثل ما انت تـْعامـلـــــــه

صدّيت منـّك مثل ما صد الشجاع مْن الجبـــان

واحرمت من وصلك أحاسيس الخفوق الشامله

لا صرت دون احساس ما تقدر تقدّم لي حنــان

لان القـلوب بحـسّها .. و بعـطفها .. متـكاملـه

إنتـه على طيّـارة الهجـران حاجـز لك مكـــان

وانا فْ مطار مْواصلك ناطرك ساعه كاملـــه

تصفح بالعنوان

أرسل تعليقك

( *حقول مطلوبة )
( *حقول مطلوبة )