قنبلة ذريّه | سمو الشيخ حمدان بن محمد بن راشد آل مكتوم - فزاع

قنبلة ذريّه

دنيتي ويا موج شعري ويا بحر عذّالي

القصيده بنفسها تحكي عن اللي بيّه

يوم شفت القلب حب وصار له غربالي

في مدرسة ( برايمري ) متخصصّه علميّه

مشكله ما شفت إلا غـترتي وعقالي

سبّته يلعـن أبوه و ضاعت الطاقيّه

لو خلقك الله حبيبي مثل رجلٍ آلي

إلا في نفس الثواني صرت لك آليّه

ضمّني بحالك الحالك واموت إلحالي

واعـتبرها يا حبيبي منحه آميريّه

ما أصدّق لو أشوفك مشكله يالغالي

كنّي قاعد وآتخيّل صورة تمثيليّه

الكلام اللي في بالك إنـّسخ في بالي

لك في قلب اللي يحبّك ترجمه فوريّه

سولفي بالأوردو بالهندي وبالبنغالي

تـدري أتكـلّم أنا كل اللغـات الحـيّه

كنّك الا لاعبة كورة قدم إيطالي

خـلـنا نلـعـب مـعـاج إمـبارةٍ ودّيـّه

المدرّب قال لّي أمسك ظهير شمالي

وانتي عادي تمسكيني يالدفاع الحَيّه

لانّي كـنتـو سابقاً ألعـب لبُـرتـغالي

أسمه (ارنالدو) وانا ويّاه مانا شويّه

بس عندي شرط واحد ما نجيب اقوالي

أو تكون اقـوالي لمؤسسة خـيريّه

لان غير الشيّ هذا أبتعد وآخالي

المهـم ما نطـلع إبنتـيـجةٍ سلـبيّـه

تخطي بحقّي وتخطي والخطا يحلا لي

وإتعمّد غلطتك وآقول هي عفويّه

الخطا لاوّل يشـوّقـني لخـطاك التالي

والغريب ان النتيجة دايماً عكسيّه

لا تقارنـّي بجـمـالك والهـلال هـلالي

ما يصحّ الرجل يتقارن مع البنـيـّه

وانت لو تبغي الصراحه وقلتها طوّالي

شفت نفسي في عيونك أحلى عنك شويّه

يا حبيبي لا تعصّب وانت ضغطك عالي

خايـفٍ بكـره تصيـبك حالةٍ نفـسيّه

لا تـهـدّدنـي ببـعــدك يالـذيـذ الـحالي

حاول تهـدّي معي فالفـتره الحاليّه

لا تهبّل بي ترى ما انته تعرف هبالي

لاعـبٍ بك لـعـبة الـدولار بالـربـيّه

ما يهز اشباك خفـّاقك ياكـود اقـوالي

يوم ادخّلها ( دبل كيك ) وتجي ناريّه

إنت زينك محـرقٍ حتى بـنات الـوالي

يا بشر يا حلو يا جذّاب يا شخصيّه

من كثر ما اخاف عيني تنعمي يالغالي

قمت ادوّر لي على نظارةٍ شمسيّه

لجل ادقـق بالنظر لامن وقـفت قبالي

واقنعك بان المفارق ( قنبله ذرّيّه )

تصفح بالعنوان

  1. 1

    فاطمة

    July 20, 2010 at 4:33 pm

    قصيدة اكثر من حلوة … صح لسانك

  2. 2

    احمد

    August 4, 2010 at 3:34 am

    القصيدة روعة … صح لسانك

  3. 3

    amira

    August 4, 2010 at 5:44 pm

    دمرتنى القنبله الذريه بس لو كانت بصوت الشيخ كانت هتبقى جامده اوى

  4. 4

    ايه

    August 15, 2010 at 3:53 am

    التشيبه الي في القصيده والافكار وطريقة ربط هذه الافكار لتكون قصيده اكثر من رائعه اكيد من انسان اكثر من رائع قصيده حلوه عاشقة فزاع

أرسل تعليقك

( *حقول مطلوبة )
( *حقول مطلوبة )