كـحـيـــلان | سمو الشيخ حمدان بن محمد بن راشد آل مكتوم - فزاع

كـحـيـــلان

من باب تـثبـيت الوعـي يا كـحـيـلان

لعـيـون دولـــه مجـتـمـعها ريـادي

زرعت في صحراء الاحساس بستان

يمكـن ألامـس فـكرة اهـل المـبادي

أمثـّـل ( المكـتوم ) والاّ ( النهـيـّـّان )

والاّ الشـيوخ الشـامخـه في بــلادي

حـصان عـزّي يسـبق ف كل مـيدان

وسهيل مجدي في سما العـز بادي

والا انـتـقـدني واحـدٍ ما لـه لـســــان

والاّ مـعـاه لـسـان .. ولـسان عادي

أحاول اوصـل غـايـتي قـدر الامكان

أصـنع نجـاحـي من كثـير انتـقادي

والمرجـله في عـيون اهلها لها شـان

مع اعـتـقـاد الـناس قـبل اعـتـقادي

والسر في قـلوب الرجاجيـل ينصان

والجاهـل بجـهـله يـزيـد الـتـمـادي

ولو صحت في قلوب المقفّين يافلان

ما فـيـهـم اللي يـسـتـمـع للمـنـادي

وهـدايـة الله ما تحـصّــل بالاثـمــان

والله يـهـــديـنـا وهـو خـيـر هـادي

والصبر كـنز الروح والذل حـقران

واللي ماعـنـده راي تـلـقاه غــادي

وانا يابو عسـكـور إحـساس فـنـّـان

أحـاول اشـرح فـكــرتي للعـبـادي

تدري وش احلى بيت سوّاه حمـدان

لعـيـون دولـــه مجـتمعـها ريـادي

ما دام كثر الحرب من يد الانـسـان

أفضل خيار نعيش من دون ايادي

تصفح بالعنوان

  1. 1

    امولج القدر

    August 17, 2010 at 4:00 pm

    القصيدة وااااااااااااااااااااااااااااااااايد حلرة تسلم الايد الي كتبتها

أرسل تعليقك

( *حقول مطلوبة )
( *حقول مطلوبة )