لا جمـع و لا طـرح | سمو الشيخ حمدان بن محمد بن راشد آل مكتوم - فزاع

لا جمـع و لا طـرح

تفرّقنا السنين وْنجتمع والجَرح نفس الجَرح

على درب الفراق دموعنا تسبق خطاوينا

شرحت ظروفنا للوقت لكن ما فهم للشرح

صبرنا والصبر جَـمره ورا الاضـلاع كاوينا

ترى وجه الـمتيّـم لو تبسّم لا تحسبه مرح

أمانيه تـْهاوى من عيونه مثل امانيـنا

بنى من ذكرياته في محيط العاطفه كم صرح

لكن هاج المحيط وما لقى له ساحل وْمينا

يا ناس العيد ماله لون وْلا له طعم وْلا له فرح

واذا قلتوا وش الأسباب قلت الله يعافينا

نلوم الوقت والقِصّه ما تبغي جمع والا ّطَرح

لأن العيب .. من ربّي خلقنا ساكنٍ فينا

تصفح بالعنوان

أرسل تعليقك

( *حقول مطلوبة )
( *حقول مطلوبة )