ضـرس و نــاب | سمو الشيخ حمدان بن محمد بن راشد آل مكتوم - فزاع

ضـرس و نــاب

باديٍ هضبٍ ماهو عالي واغنـّي بالسليقه

تـوّنـي في ذمّــة الـدنـيـا وباكــورة شــبابي

ما حـدٍ منـكم محلـّفني لكـن احـلى دقـيـقه

والله انها وقـفة الرجّال في روس الهضابي

كل ما بلّ السـحاب بوبـله لـسـاني وريـقه

ألعـن الأيـّـام واسـتـثـنى هـمالـيل السـحابي

إن طريت ابكي واهلّ الدمع وآسوّي حريقه

وآحلف محدٍ يسوق الروح وانهى من حسابي

والحزن يمـتد له شـريان الامـعاء الدقـيقه

والدهر هو عِلـّة الرجّال ، ثوري ياعصابي

ما بغيت آقول يا الاجواد شوفوا لي طريقه

لين حـدّتني مطانـيخ العـلوم وجـبت مـابي

لين شفت ان الصحيح اوّل ملفّات الحقيقه

مرّني هاجوسي اللي ما توقعت وسرى بي

ان شهدت ان البشير اكثر طموحاته تعيقه

فارس الخرطوم واستنكرني الشيخ الترابي

آعثر واقوم والشرهه على الوقت ورفيقه

آتصبّر وان غدت كانك علابيك ف علابي

كل حـمـلٍ كايـدٍ تكـفي من النـشوه يطـيقه

ماني اللي ياتي الحلـّه ولا هـو يـنـدرى بي

شاعرٍ بلحالي آطـول القمر واطفي بـريقه

واعجـب القـرّاء والنـقـّاد سمحـين الجنابي

إن تماديت افتخر نفسي في الاعذار اللبيقه

ما على شبه الجزيره زود ياخور الروابي

يالله انـّك جابر العـثرات فارج كل ضـيقه

طالبك يا سافـط الجنـّه لابو بكـر الصحابي

ما تـورّدني على دلـّة ردي والاّ ابـريـقـه

لو غدت من قسوة لحاله حطب ضوّي ثيابي

والهوى لو يعـقد حجاجيني السمح الطلـيقه

ما ثنى رجلي عن الممشى على خد الترابي

والغـلا ياللي سكـبـته في فـوادي لا تـريقه

كـلما هـلـّيـت بي قـالـت لي الفـرقى هـلابي

الكلام الزين ياللي جـيت بالسـمع استريقه

لو غرامك سوسةٍ في ضرسي وتطمح لنابي

المـوادع جـرح لقـلوب المحـبّـين الرقـيـقه

وانت يا تختار في جرحي وتختار الصوابي

وف كذا الحالات لك قلبي يا ساعته ومضيقه

لين اضمّ القبر وتركـّز علي روس النصابي

أعشقك عاد البدو ما هم يعرفون الموسيقه

عـادها إلاّ خلـف هـذال والمـطـرب حـجابي

ما يجـيك الشـك لو ترحل كذا وبلا وثـيقه

ويعـداك اللوم لو ترجع عليّ روس الركابي

والله انها صنعة الخلاّق في بعض الخليقه

واعـذابي لو تـشوف جروح قلبي وا عذابي

إنت لو ترفع ستار القلب لحـظات وتويقه

شفت نكـبة تونـس الخضراء من شلفا ثيابي

بس هذا ماهـو بمعـناه يالشـمس الشـريـقه

إنت طـاريّـك مجـرّد هـم واحـزان وعـتابي

ما بغـيت احلـف لأنـّي هـذه أحلى دقـيـقه

وقـفة الرجّال يا أحمد على روس الهـضابي

يوم شفت ان الصحيح اوّل ملفّات الحقيقه

لو غدت من قسوة لحاله حطب ضوّي ثيابي

تصفح بالعنوان

أرسل تعليقك

( *حقول مطلوبة )
( *حقول مطلوبة )