طـوية زمـن | سمو الشيخ حمدان بن محمد بن راشد آل مكتوم - فزاع

طـوية زمـن

على باب الأمل أبكي وانا أنثر ورود الشوق

ويجـمعـها رجى الأحـلام والله يـحـلـّها ليـّا

أسوق بعزمي احساسي إلى مالا تروم تسوق

يعاندني رجى عمري وكل من جيت له عيّا

يا دنيا ما عرفت الليل من طلعة ظيا لشروق

تفارق روحي بروحي قبل لا آقـوم واتهـيّـا

يا دنيا بـسّ يا دنيا تـراني ع الحـزن ملحـوق

تـراني عايـش الحزن العميق وقلت له حيّا

يجيني من يمين ومن شمال ومن تحت أو فوق

يجـيني كـيف ما يهـوى المهمّ انـّه يبا هـنيّا

هـنيّـا بين ضـلعي وبين روحي ساكنٍ بخـفـوق

وبعـد حبّـك أنا والله زاهـد ما ارتجـي شـيّا

عشقتك كيف انا ما ادري من العاشق من المعشوق

من الظالم من المظلوم من الميّت من الحيّا

وفي غمضة بصر غبت وتوارى حبّنا المرموق

حسافه يازمن كيف انطوى ذاك الزمن طيّا

تحـنّ عـيوني لشوفـك وصـوتي خافـتٍ مخنوق

ينـادي وين ذاك اللي جـمـع قـلبيـنـنا سـويّا

ينادي والعـشـق صـمت العروق ودمّها مدفوق

عشق صمت الحروف ولا نطق إلاّ وداعيّا

يا أجمل حب انا عشته أبارك لك ولو بي عوق

أبارك لك ولو بي همّ ، أبارك وانكوي كيّا

تهانـيـنا يا حـبٍ من قـبل ما يـنـولد مـســروق

تهاني قالها قبلي ( إبن لعبون ) إلـ ( ميّا )

تجـمّـعـنا ياليت اللي جمعـنا خافـقـين وشـوق

جمعـنا خافقـين وشوق جمع غالي ومغـليّا

إذا هـيّـا تـعـلـّـمـني تـفــارقـنـي بـأحـلا ذوق

تـفارقـني وانا أبـكي .. يامحـلا ذوقها هـيـّا

تصفح بالعنوان

  1. 1

    فاطمة الهاشمي

    August 2, 2010 at 6:53 am

    ربي يبعد عنك الحزن …. و يسعدك و يحميك

    صح لسانك

  2. 2

    ايه

    August 10, 2010 at 5:11 pm

    عشقتك كيف انا ما ادري من العاشق من المعشوق من الظالم من المظلوم من الميت من الحيا صراحه بيت ايهبل قمه في الروعه الله يبعد الدموع والبكاء والحزن والهم عنك يا رب ان حزنت نحزن وان بكيت نبكي فربي يبعد البكاء والحزن عاشقة فزاع

أرسل تعليقك

( *حقول مطلوبة )
( *حقول مطلوبة )