رَجُـل مـثـالـي | سمو الشيخ حمدان بن محمد بن راشد آل مكتوم - فزاع

رَجُـل مـثـالـي

عـلى الله ما تغـيّـبـني اللـيـالي

لو ان صدوف صكّات الليالي

تـنـصّـاني وانـا رجـلٍ عـزومه

يصـد بها النـوايـب ما يـبـالي

أفـل حـجايـه بـوجـه الكـبـيـره

وتصغـر من فضل ربّي قبالي

واحب الطـيب واللّي يفـعـلونه

ويرخص من غلاهم كل غالي

ولـولا حـكـمـة الله ما خـلـقـنـا

وأمـرٌ قـد كـتــب أوّل وتــالي

سألت الله كوكـب في المجـرّه

جعـلت الطيّـبين من الرجالي

يحـكـمـونه بحـكـمٍ يهــتـني به

عـزيزٍ من عـليه الوقت مالي

واذا قـالـوا مـدوّرة السـوالـف

ترى بعض النظم نظمٍ خيالي

باقـول الله يجـمّــل من تجـمّـل

وانا قـبل الشعـر رجلٍ مثالي

وانا شاعـر قصـيدي فـيه منّي

طموحي واعتزازي واتكالي

لكـن ياللي تـعـذربـني تـمهّـــل

أنا خـوّة رفـيقي راس مـالي

تـنافـسـني بـطـول الـظـل لكـن

ستر ظل الشجر ظل الجبالي

وانا لو اعـتزلت الشعـر لحظه

يموت الشعـر في يوم اعتـزالي

مقامي أشرف مْن ايّة قـصيده

أسـوّيها على الـدرب ارتـجـالي

معي ذكـرٍ عليه ابني حـضاره

وانومس به عمامي مع خوالي

ومعي ذِكـرٍ إلى منـّه سـمع به

من الحـكّـام واصـحاب المعـالي

كـريمٍ طـيب راسـه يقـتـدي به

ولا يـلحـقـه شـك ولا احـتـمالي

تـنـافـسـني عـليه ويحـتـزم له

يـدوس المسـتحـيله والمـحالي

تـقـزّمتُ في عين اقـزم مجـرّد

كـبرتُ في عـين كـبار الرجـالي

ومتى شدّوا الرحال آشد عزمي

ومتى ما عزّموا .. شدّت رحالي

قدم رجلي على الطرقه ما تتعب

أعـرّضـها على وعــر الجـبالي

معـوّدها على دوس المـخاطـر

وحـمـلي ما تـحـمّــله الجـمالي

وردت البيـر وعـزومـي قـويّه

تـورّدنـي طــويـــلات الحـبـالي

سليل المجد راع الطيب جـدّي

وابوي اللي بنى صرح المعالي

نعــز اللـي تــذرّى فـي ذرانــا

يعـيـش بوسـطـنا آمـن وسـالي

عـرين الأسـد يـبقى له مهـابه

نـزفّ الروح دونه والغـوالي

صغـيـر القـوم مـنـّا لا نخـيـتـه

تـنهّـض مثل ابو زيد الهلالي

زمـان الخـف والحـافـر ثـبتـنا

وشيّدنا العلم في راس عالي

بفـضل الله في هـالـكون سدنا

نصرنا الله بعد عسر الليالي

سفـينتـنا رغم الاهوال ترسي

بفـضـل الله وقـروم العـيـالي

عـطانا الله من خـيـره وجـدنا

عطانا عـمّ الاقصى والموالي

تبالي من صروف الدهر قومٍ

ولكـنـّا .. رجـــــــالٌ لا نـبالي

لكـن نظـرات أفـكـاري بعـيده

أبـي ذكـرٍ يـسـمّى لي لحـالي

طـمــوحـاتي كــذا والاّ بـلاها

عــزومٍ ما تـوصّـلـني مـثـالي

ترى الناس العزيزه يوم تسأل

عن الرجّال مضمون السؤالي

تقول الرجـل هذا ويش فعـله

ماهي بتـقـول هذا ويش قالي

لو ان القوم بالهرج اغـلبونا

يابو وجهـين رعيان الحلالي

لكن لا تنـفعـل يا قـلبي ياللي

طـمـوحـك أكبر مْن الإنفعالي

تصفح بالعنوان

  1. 1

    ايه

    August 20, 2010 at 7:58 pm

    قصيده ابداع في ابداع واكيد لايقه علي سموه وهذا كله مش موفيه حقه لان فزاع اكبر من اي كلام والكبير الله اكيد صراحه كل يوم يكبر فزاع فعيني اكثر انشاء الله ربي يحميه وكل ما في باله يعطيه ومن عيون الحساد يحميه يارب عاشقة فزاع

  2. 2

    wedad

    September 3, 2010 at 6:04 am

    احب اللي يحب الخيل
    واوصافه معروفه
    فارس ونشمي وابن خيال
    وبالذهب اكتب احروفه
    من افعاله الرجال اتغار
    ووصفه امحير الشعار
    لانه فارس في زمن غدار
    مابهاب في الحق لاحاكم ولاآمار
    لو وصفته احروفي يصيبها دوار

  3. 3

    بسمة المغرب

    September 23, 2010 at 3:25 am

    في وصفه والله تحتار وفي مدحه الكلام ينهار
    هدا حمدان ابن الاخيار هدا فزاع مجنن كل دار
    اصيل وتشهد له الاشعار ومن صورته الجمال يغار

أرسل تعليقك

( *حقول مطلوبة )
( *حقول مطلوبة )