حـارث البـحـر | سمو الشيخ حمدان بن محمد بن راشد آل مكتوم - فزاع

حـارث البـحـر

إلـى مقـام والــدي وسيّدي صاحب السمو

الـشيـــخ مـحـمـد بـن راشــد آل مـكـتـوم

نـائب رئيس الدولة رئيس مجلس الوزراء

حاكم دبي حفظه الله بمناسبة ذكرى توليه

مــقـاليــد الحـكـــم فــي إمـــارة دبـــــي

يا بـرّاق القصـيد إبـرق لهاجـوس عليـه الـــزام

جـزيـــلات البـحـور اللـي مـعـانـيـها تـلازمـها

جزيلات البحور اللي وفت لاهْـل العـقول ذمام

لعَـلّك فـي سِــما الافـكـار تـشـعـلها وْتـغـنـمـها

عشانك من سحب الْغمام .. سقنا لك كنيف غمام

يا إمّا انـّـك تـروّي قـاعـها .. والاّ .. تـسـلـّمها

يصـوم مْن القصايـد خاطرك لكن متى ما صام

ما يفـطـر غـير بابـياتٍ هـل الطـولات تـفهـمها

أحاسـيس القـلوب الغافيـه ماهي بْحلول إلـهـام

لكـن أهْـل القـلـــوب الصـافـيه مـولاك يلهـمـها

وانا لا من سَرَجْت خيول فكري والصفوف زْحام

تعـدّيت الصـفوف اللي هَـل القـيـفان تـزحمهـا

يا عَمّي وانت ضـرغام تحَـدَّر من ظهر ضرغام

يا عمّـي والمـكارم يفـخـر بْطـاريك مـعـجـمـها

ياريّـسنا ( خليـفة ) لي بْفـكـرك تـقـتدي الافـهام

ويابو ( خالد ) يا والي عـهد دولـتنا ومحـزمها

أهـنـّيـكم بـشـيخ ٍ في ســما العـليا يـقـود زْمـام

يسمّى ( حارث البحـر ) وْبحور الدر ينظـمها

هو نائب ريِّس الدوله في كل أمر ٍصعيب وْهام

وريّـس مجـلـس دْروع الـبلـد و (دبي) حاكمها

أهـنـّـيـكـم وانـا في العــام هـذا مثـل ذاك العـام

تـعـظـّمـنـي مـحـبّـتـه وْمـحـبّـتـكـم واعـظـّـمها

بيــوم ٍمثـل هـذا اليـوم متـمـيّــز على الأيـّـام

تـكـوّن عـيـد في دار ٍســــــلاح رْجـالهـا دَمْـها

يسمّونه يابو راشد هل الصحف وْهَل الإعلام

باسم عيد الجلوس وْكان تـسـمح لي باعـلـّمها

أنـا اسـمّـيـه عـيـد المجد لانّ المجد لاجله شام

ولانّ بْــلادنـا رب السـمـا بـقـدومــــه اكـرمـها

تبـاشـرنا بْجـلـوس اللي لا قـام يْحـلـّها لا قـام

شـهـوده واسـعـه والـدولـه بْرؤيـاه  يدعـمهـا

عـقـول المعـرفه تحـمـل من الإدراك والإلمام

مالا يـمـكـن تحـمّـله الـمـعـاني لو نـتـرجـمهـا

يابو راشد جلوسك وَقـفه وْعيدك نصر واكرام

دول الاكـرام تهـديك التـهـاني من عـواصمها

يابوراشد حضورك نور شمس وْخطوتك قدّام

تـجي قــدّام حـتى قـبـل رجــلك ما تـقــــــدّمها

تـقـدّمـك العـزوم وْطيـر عِـزّك للـمـعـالي حـام

شهـادة حـق .. واللي ينسأل عـنها ما يكـتمها

شـهد حتى معـاديك وْتكـلـّم عن مـدى إسهـام

جهـودك فـَ التـطـوّر قـبل ما اصْـحابك تكلـّمها

على حجم الفعـول يْقـيِّمون الصَّارم الصمصام

لكنّ فـْعـولك اصـحـاب الفـكـر تـعـجـز تقـيّمها

يا عـقـل (دبي) يارمـز البـنا ياللي كبحت لْجام

مـعـاديـن الـتـطـــــوّر ليـن قـرّت لك مـفــاهـمـها

(دبي) اللي حـقايقـها تعَــدَّت مسـتـــــوى الاحـلام

عسى الله عن عيون اهْل الحسد والـزيف يعصمها

(دبي) اللي مـفاخـرها فِـعِـل يـمـناك يالمـقـدام

شـعـوبك تفـتدي يمناك لانـّك صـرت معـصـمها

شـعـوبك ما تقسـَّم يا طـويل العـمر سَبْع اقـسـام

يـوحِّــدهـا سـمــوّك واللـيــالي ما تـقـسِّــمها

ولا زالـت تـحَـلّـى بالـصـفـات الـنــادره ما دام

سـمـوّك يحـتضـنها عِـز و يْـرتـّب مواسـمها

طـويل العـمر رفـَّت عن يـمينك شامخات اعلام

غـنـَمْت الـرَّايـه اللي مسـتحـيل الغـير يغـْنـمها

حرثـْت البحـر بيـْدك وانت فـوق البحـر بدر تمام

على كيـفك تفـاصـيل البـحـر يا شـيخ تـنظـمها

على كيـفك معـالمها سَـرَت واسـرت بها الآنـام

معـالـمـها كبـيـره ، وانتـه اكـبر من مَعَـالمـها

تفضـَّل وانت والله فـوق روس اهل العقول حْسَام

إذا احتارت عقـول الناس سيف الحق يحـسـمها

( محـمـد إبـن راشــد ) كـلما يـطــرى نـفـزّ قـيـام

نـفـز قـْيـام للي يـكــرم شـْعـــوبـه و يـحـشـمـها

لابو راشـد ملـوك الأرض توقـف منـزله و مْـقـام

لـو انّ الأرض تـتـكـلـَّم … قـَسَـم بـالله كـلـَّـمها

حفـيد اهْل العـروبه ، ناصر الدين وْ سَند الاسلام

عـسـى ربّـي يـسـلـِّمْه لـْعــروْبَـتـه وْ يـسـلـّمها

سـميّ ( محـمد ) اللي للنـبـوّه كان مـســك خـْتـام

أبـوي اللي يـمـيـنه بالـسَّـخا والجـود خـاتـمها

نجـل ( راشــد ) مـؤسـسـنا وخـاله سيِّـد الحـكـّام

يحَـكـْم بْـفـطـنـتـه من قـبل هالـعـالـم تـحـكـّمها

أهَـل الاهـرام سـوّوا مـعـجـزه لمّا بـنـوا الاهـرام

لكـنـّك قـبـل ما تـبـني بـلـد .. تـبنـي مـكـارمها

تـفاخـر بك ( دبـي ) الـدرَّه اللي يـعـجـز الـرسـَّام

ما يرسمها على شانك برؤيـا الفـكـر راسـمها

دروب اسمك من (محمد) إلى المكتوم خير وْسَام

تـأدّي للـفـخـر والمـجـد والـعِـزّة عـلايـمهـا

علامه من تعـجّـب ! .. قبلها علامة استفهام ؟

بَعَـد اسـمـك وتاريـخ النـجـاح اللي يتـمّـمها

ترى صورتك قبل انها تْعـلـَّق في الطريق العام

تعـلـَّق في قـلوب الناس لانـّك صرت عالمها

تصفح بالعنوان

  1. 1

    عبدالله الشملان

    November 5, 2010 at 7:06 am

    اهني سيدي مقام عمي وسيدي صاحب السمو الشيخ محمد بن راشد ال مكتوم بي هذا الابن الرائع والذي تفتخر فيه الامارات وانا افتخر فيه بالكويت يا عسى اعماركم اطول يارب

أرسل تعليقك

( *حقول مطلوبة )
( *حقول مطلوبة )