إلى البـراءه | سمو الشيخ حمدان بن محمد بن راشد آل مكتوم - فزاع

إلى البـراءه

حبيبي والله انّي ما قدرت استوعب اللي صار

لفا خبر الـنيا واخلـفت ظن اللي صدق ظنـّه

أنا كـذّبت فيك اللي نقـل لي صادقـات اخبار

كتمت انفاس صدري وافضحتني جرّة الونّه

حبيبي ضاعت دروب الرجا والدار غير الدار

سكـنت بـدار من يـسكـن بها ما تـلحـقـه منـّه

ياويلي كل ما اطالع براءه تـلمحك الانظار

ومن يسـكـن بعـينـك كيف تـقدر تبتعد عنـّه

بدت تتشابه دروبي يالين الدرب فيها احتار

أنا المغرم وكانت لي دروب الشوق مطمنـّه

أعاتب كل خطوة شوق واصنع للذنوب اعذار

يالين العـذر أصبح ذنب حظي واعتـذر منـّه

إذا سن الدهر سيفه وحلـّت بالقضا الاقدار

من يـرد للـقضا سـيفه إذا سـيف الـدهر سنـّه

إذا جفـّت موارد هالتمنّي واذبلت الازهار

من يرد السـواقـي والـندى والعـطر والـبَـنـّه

كتبتك والقوافي بيت سرّي والبيوت اسرار

تعبت اخفي جروحي والشعر يوشي وانا اكنـّه

حبيبي وانت في قربك وبعدك جنـّتي والنار

واذا لابـد من بعـدك .. حـبيبي نارك الجـنـّه

تصفح بالعنوان

  1. 1

    ايه

    July 31, 2010 at 4:19 pm

    الله يا فزاع القصيده حلوه وطريقة القائك لها احلي صراحه هذه اول مره قصيده تاثر فيا انت انسان مو عادي بخيال مو عادي بتفكير مو عادي برؤيه مو عاديه باخلاق مو عاديه بشكل مو عادي انت فارس وشاعر وسياسي مو عادي والاهم انك فزاع الانسان الي مو عادي

أرسل تعليقك

( *حقول مطلوبة )
( *حقول مطلوبة )