أحمر الورد | سمو الشيخ حمدان بن محمد بن راشد آل مكتوم - فزاع

أحمر الورد

أحمر الورد أجمل شيّ فـي البستان

بين صوت الطيور وخضر الاغصاني

والـمشاعر .. لو تجرّد من الإنسان

كيف يَـعْرف شعور اخوه الانسـاني

والـمحـبّــه من الإيمـان .. والإيمـان

شيّ وسـط الـضمير ، وشـيّ برّاني

وانت يالأنسـي اللي كنّك مْن الجان

إختر الشـكل الاوّل ، وافهـم الثاني

لك سـنه وانت لا راضي ولا زعـلان

قصـدك تذلّـني ، والاّ تْـحـدّاني

سـامح الله سـطـوة رمـشـك الـفتّـان

يوم خـذني على غـفلـه و ودّانـي

وسامـح الله قلـبي يوم شـافـك لان

لين حبّــك تمكّـــن وسـط وجـداني

وسط وجداني اللي لك بنى وجدان

كلها تشـتـكي فرقـاك ، وتـعـاني

انت جاني علي بالـهـجر والـحرمان

والـجروح الـجروح أشكـال والـواني

جرح .. دمعته ما تنشاف بالأعيان

وجرح .. دمـعـته منظوره بالاعياني

وجرح مجراه مجرى الدم في الشريان

وجرح .. كنّه طعون سيوف عدواني

وجرح .. يقتل شـعور العاشق الولهان

لو بغـيت اشرحه .. ما يقدر لـساني

وجرح فـي الذاكره ما يقبل النسيان

آتذكّـــره دايـم .. رغـم نـسـياني

آه يا ما اكثر جروحي .. لكن غلطان

كان ما تعرف الـمجـني من الجاني

يا زمن لا توصّي صاحبك ( حمدان )

قبلك ( محمد الـمكـــتوم ) وصّاني

صاحبك لا وقف يصهل صهيل حصان

يْتحـمّل طـعـون فـلان وفــــلاني

ومن يعامل جميل الناس بالنكران

مستحيل احشمَه لو هو من اخواني

كل إنسان يملك فـي الحياه انسان

من مـعـانـاتـه يـقـدّره ويـعـــــاني

ودامـها ما تسـلّي كـثرة الـخــــلاّن

خلّهم فـي سـلام وعيـش وحـداني

تصفح بالعنوان

أرسل تعليقك

( *حقول مطلوبة )
( *حقول مطلوبة )