رمز العز علمني | سمو الشيخ حمدان بن محمد بن راشد آل مكتوم - فزاع

رمز العز علمني

الـفسـق آفـه .. لكن التـقوى خشـوع

أبـوي رمـز الـعـــز عـلّـمني بـها

يا مدرسـة الامجاد والقلوب البتوع

أنـا على هـقوتـك يا هـاقي بها

مْن الفلاسي ساسي وعندي فروع

من دار زايـد عز الارض وطيبها

شاعر واحب الـفزعه وقلبي فزوع

يالين شـفت الـناس سـمّوني بها

واهل الصمود اللي ماترضى بالخنوع

ألله سـبحــــانـه يشـبّـهـني بـها

أحب من جزل الـبيوت اللي تروع

أهل الـفكـر لا قامـت تـغـنّـي بها

ترى القصيد انـواع وانا كـل نـوع

أبـدع فـي تركـيـبـتـه وآسـالـيبـها

يا اهل السيوف القاطعه واهل الدروع

ترى الـسـنيـن الله يعـلم غـيـبها

أشـبّه الدنـيا على البكرة الدفـوع

دايـم تـكــون الاوّلـه ترتـيبـها

إن واصلـت راعـيّها أصـلـه جــزوع

وان قاصرت بانت فـضايح عيبها

والاّ أشبّـهـها على الـبنـت الـفـروع

إللى عـوى بيـن الـحــنايا ذيبـها

نـقـبل لها مادامـها حـلوه الـطـبوع

ونصـد مـنها لا تكـــاثر شـيبـها

أعمارنا تحسب من ايّام السـبـوع

تجري لكن الـناس ما تدري بها

ويوم الثلوث اللي قبل يوم الربوع

ذكراه فـي قلبي وش آسوّي بها

ويا وردة البستان قطّافك قنوع

وبعض الورود .. الله على تـعذيبها

غنّـيت لك ما تنطرب منه السموع

طـرايـفٍ تـعـجـبك فـي تركـيبها

والبـعد مثل السـيف والـفرقى تـلوع

لا تطري الفرقى وتجرحني بها

لحّنت لك حـزني على وتر الدموع

وخلّـيت قلـب الـعاشـق يغنّـي بها

ومشيت درب فراق ما منّه رجوع

والـمـغـترب نفسـه شكـت تغريبها

لو قلت لي جيب الثريّا.. قلت طوع

أمـد كـفّي للـســــما واجـيـبها

تصفح بالعنوان

أرسل تعليقك

( *حقول مطلوبة )
( *حقول مطلوبة )