في السما دروب | سمو الشيخ حمدان بن محمد بن راشد آل مكتوم - فزاع

في السما دروب

إسمح لنا (دنلوب) في أسم (دنلوب)

واخوك الاصغر لي نسمّيه (مكـلين)

إنت الـمَلك وجـنودك طيور لقـروب

واختـر فالجـيرات وِالاّ الشـواهين

كم طير قانِـص لـكن يْكون مطـلوب

خَـرّب وِنــحن نْطـالبـه يَوفـي الدين

إلاّ انت ياللي مايجي منك عَذروب

استغـفر الله مابغيت احلـــف يمين

صوايدك تلمع من شْـحوم لخروب

تلـمـع لكن ما هو بْلـمع الـمـزايـين

أركد من الـما لاغدى مبطي بْكوب

وبْكَفـخة جناحـك تِـرَكّـد شياطـين

خَبّر هَل الجيبات عن قوم هارتوب

الاستيـشنات استنجدوا بالنياسين

يبغــون مثلك لانّه الزيـن مرغـوب

لكـن انتـه ويـن ، وافكــارهـم ويـن

الناس يوم تْـهِـد يـمشـون بالدوب

وانا أهـدّك سـرعتـي فـوق تسعيـن

وتطير في صوب وْنواياك في صوب

وترقـى السما كنّـك تسـوّي تـمارين

ايلين سوّيت بسمـا صـيدك دروب

دروب ترسـم فالسمـا من جـناحين

زورك خذوه الفكتري صَب مصبوب

ومنكَبك نـاسٍ يدرســونه لذا الحين

عزّيت ناسك وانت بالفعل محبوب

على ضـيوف اهل البلد والـمقيمين

أسمك غدا غيّاث والاسم محسوب

(غيّـــاث) يوم تـغيثـنا فـ الـميـادين

هاذيك مضروبه وهاذاك مضروب

من فعلك تـخلّي الحـباري كـراوين

وطيـورنا أنــــواع غالـب ومغـلـوب

ومثـلك يجي مرّه بعد عشـرة سنين

واسمح لنا غيّاث في اسم (دنلوب)

واخـوك الاصـغر لي نسـمّيه مكـلين

انت الـملك وجـنودك طيور لقـروب

إختـار فالـجيـرات قبل الشّـواهـين

تصفح بالعنوان

أرسل تعليقك

( *حقول مطلوبة )
( *حقول مطلوبة )