مفهوم | سمو الشيخ حمدان بن محمد بن راشد آل مكتوم - فزاع

مفهوم

ياليل ياللي في سماك نجوم

ياصاحب الولهان والمهموم

عرفتني والاّ  ما زلت مشبّه

نعم أنا حمدان ابن مكتوم

اللي فهم أكثر شعور العالم

وهو شعوره ماهو بمفهوم

يحب يكسب هيبته بذراعه

مايحب يكسبها بحب خشوم

صارت عيوني تستلذ السهره

وعيون غيري تستلذ النوم

فإن ظننت ان السبب من غالي

جذب فؤادي عوده الـمبروم

أقول ظنّـك غير ظنّـي .. لكن

تراك عندي غالي ومحشوم

لو كنت مسقومٍ من اللي حبه

بين الحنايا ، قلت لك مسقوم

أنا سهرتـك والسهـر يغـريني

عندي من احداث الزمان علوم

ترجمتها لك في قصيدة شاعر

حسب قـوانين الشعر محـكوم

وانا على نظم الشعر من صغري

غير البيـوت النــادره ما اروم

تغريني الأفكار واجمل فكـره

تْلامس اللي في الصدر مكتوم

أرسم طريق القافيه والـمعنى

رسم الطريق الواضح المعلوم

والشاعر اللي يدعمه جمهوره

تلقـاه دايم بالنصـر مدعـوم

دارت رَحى حربي مٓعٓ  أيامي

حاربتها وآنا معـاي سهـوم

الصبر والايمان ان الـمؤمن

لابـد لـه من يومـه الـمحتوم

عندي أمل بالنصر لو قلتوا لي

ترى النتيجه وضعها محسوم

ويا منافسيني في بقاع الدنيا

عن الحـسد والكبرياء آشـوم

روحي رياضيّه وقلبي صافي

أنا في كوم وحاسدي في كوم

أهنّي الـفـايـز علي وارفـع له

كفّي وارحّب فيه في الـمرموم

واللي ماهو ملزوم في تقديري

أنـا في تـقـديره تـرى ملـزوم

وان كانت النخوه معه معدومه

طيبي في راسي ماهو ْبمعدوم

أعاملـه باخـلاقي اللي كانت

مشهورةٍ  عن جـدّي الـمرحوم

لو كل طيرٍ في جناحه ريشـه

أهل الصقاره تعرف الصيروم

وتميّـزه عن غيره من اوصافه

لو كلهّا فـوق الجـبال تحـوم

ان شافته ماتلتـفت في غيره

وان سامته قامت تزيد السوم

ويا زارعين الثوم في بستانٍ

عشبه خضر لاتزرعون الثوم

الناس تعشق نفحة الريحانه

والـفل والياسمين والـمشموم

وصيّـة القـايد لإبـن القـايد

اللي يكـرّرها زمـانـه دوم

ماهو مهم انّه يطيح الفارس

مليون مَـرّه من طعون القـوم

لو لم يكن فارس ماجاته طعنه

بس الـمهم انّـه يعـرف يقوم

وانا عزومي ماتعرف الطيحه

عندي من الصدمات قوّ عزوم

اللي يحسب ان دمعتي من عيني

باتطيح ، قولـوا له عليه اللـوم

لو نفرض انها طاحت مْن عيوني

تراي واقـف وقـفة الشغـموم

مْن الغيوم تطيح قطره قطره

لكن ماشفـنا تطـيح غـيوم

لله رحمه تكفي اهل الدنيا

من يوم آدم لين هذا اليوم

فاليرتجي رحمته من يرجوها

والـمنحرم منها هو الـمحروم

لا شفت لك انسان مُعطى نعمه

لاتحسده في رزقه المقسوم

ولا تسب الوقت ، وَلاَ حظّـك

وتزمّ  خشمك مايفيد الزوم

يـومٍ عليك ويوم لك والدنيـا

ماترحم الخادم ولا الـمخدوم

لو تنصر الظالم على من يظلم

ياويلك مْن الواحــد الـقيّـوم

من دعوة الـمظلوم قل للظالم

يحذر ، لأن ربّي مع الـمظلوم

وَلا تعاتب كل شخص بزلّـه

الناس مافيهم حدٍ  معصوم

الاّ نبي الأمّـــه اللي ديْـنَــه

هدم صنم كسرى وذل الروم

وأهل الخيانه والغدر والفتنه

اللي يجاملها ترى مأثـوم

لو انها بهـدوم بين العالم

كأنّها تمشي بدون هـدوم

وهذه رسـالتي لاصحـابي

وأعدائي اللي فكرهم مسموم

ارسلتها عبر البـريد العاجـل

يوم اكملت في ظرفها الـمختوم

وَلا كشفت اللي يدور فـ خلدي

لكن كشفت الواقع الـمشؤوم

هَل الكلام اللي أقوله واضح ؟

مفهوم .. والاّ  ماهو بْمفهوم ؟

تصفح بالعنوان

أرسل تعليقك

( *حقول مطلوبة )
( *حقول مطلوبة )