| ||
| مشاهدة نتائج الإستطلاع: من يحبكـــــــــ كثرمااحبك انا | |||
| ممتاز |     | 36 | 92.31% |
| جيد جدا |    | 0 | 0% |
| جيد |    | 3 | 7.69% |
| مقبول |    | 0 | 0% |
| المصوتون: 39. أنت لم تصوت في هذا الإستطلاع | |||
 | |
| | أدوات الموضوع |
|---|
| ||
| مشاهدة نتائج الإستطلاع: من يحبكـــــــــ كثرمااحبك انا | |||
| ممتاز | | 36 | 92.31% |
| جيد جدا | | 0 | 0% |
| جيد | | 3 | 7.69% |
| مقبول | | 0 | 0% |
| المصوتون: 39. أنت لم تصوت في هذا الإستطلاع | |||
| |
| | أدوات الموضوع |
|---|
09-10-2008, 12:34 PM
| #23 (permalink) | |
|
عضو مجتهد 
 |  الجزء الخامس في المستشفى الجو كان كئييييييب بعد مانقلوا غاليه له.. أبوها القوي الي عمره ما تأثر بأي شي واقف عند باب غرفة الدكتور وينتظره يظهر له ويطمنه وهو مب قادر يخفي الألم الي بان على ويهه.. وأم غاليه أخس عنه مب قادره تمسك دموعها.. بنتها وأغلى شي بحياتها مب عارفه تساعدها.. أبوغاليه مارضى أي أحد من الموجودين بالحفله يروح معاهم المستشفى غير فجر وناصر.. وربيعاتها راحوا على بيوتهم وأهلها يلسوا ينتظرون أي خبر عن غاليه.. وبعد نص ساعه طلع لهم الدكتور وهو يضحك.. أبوغاليه: بشر عسى الله يبشرك بالجنه.. الدكتور راشد: هههههههه انت عندك بنيه مثل العسل.. أم غاليه: دكتور شو فيك بنتي مريضه وانت تضحك.. الدكتور راشد: دلع بنات يا أختي.. وبصراحه البنيه مثل الغزال مافيها شي.. أبوغاليه: أقدر أدخل عليها.. الدكتور: هيه عادي.. وكلها ساعتين وبنظهرها.. دخل أبوغاليه وأمها وفجر وناصر وشافوا غاليه يالسه تسولف مع النيرس وهي تضحك ولا كأنها كانت مريضه.. غاليه: بابا تعال إسمع آخر نكته.. ههههههههه أم غاليه تلوي على بنتها: حبيبتي غاليه اشحالج غناتي.. أبوغاليه: انتي بخير حبيبتي.. أحسن الحين.. غاليه: عادي بابا مثل كل مره أطيح وأقوم مثل الغزال.. ههههههههه فجر: الله يخس إبليسج نحنا ميتين من الخوف عليج، وإنتي تضحكين.. ناصر: حمدلله على سلامتج يابنت عمي.. غاليه: الله يسلمك.. حرام اختربت حفلتي.. أبوغاليه: تفداج يانظر عيني.. المهم صحتج، وكم مره قلت لج لاتجهدين نفسج.. كله ولاتعبج.. انتي تعرفين قلبج مايتحمل.. غاليه: بابا أنا أعرف إنه قلبي ضعيف، بس مايمنع إني أستانس بحياتي.. أنا عشت 18 سنه مع المرض، وبكمل المية إنشاءالله بعد وبربي عيالي وعيال عيالي بعد.. أبوغاليه حط يده على قلبه وحظن بنته.. وفجر وناصر اطلعوا برع لأن النيرس تبي تسويلها شوية تحاليل.. وبعد ساعه إلا ربع طلعت غاليه من المستشفى.. فالبيت الكل كان يالس ينتظر وصول غاليه بعد ماتطمنوا عليها، عبدالعزيز يالس حذال ميعاد ويسولف وياها.. والكل يالسين ويسولفون.. حتى أحمد مارضى يروح إلين يطمن عليها.. عبدالعزيز: ميعاد شو فيها لو تزوجنا وكملتي دراستج..؟؟ ميعاد: تو الناس عزيز، أبا أخلص دراستي وبخاطري أشتغل و.. عبدالعزيز: تقدرين تسوين كل هذا ونحن متزوجين، أنا انسان متحظر ومب مانعنج عن الشغل.. ميعاد: بصراحه أخاف أحمل ويأخرني الحمل والبيبي عن كل شي.. عبدالعزيز: الي الله كاتبه بيصير.. بس ياميعاد انتي تعرفين كم عمري، خلاص مب باجي شي عن الثلاثين، وأبا أكون وياج من الحين وأعيش وياج باجي عمري.. وعيالي أبا أربيهم وأنا بعز شبابي.. ميعاد: عزيز باجي سنتين وبخلص دراسه وبعدها..... عبدالعزيز: ميعاد سكري على الموضوع.. ميعاد: عزيز زعلت..!! عبدالعزيز:ما أعتقد يهمج زعلي، الي براسج بتسوينه، وأنا إنسان أبا أتزوج وأصون نفسي.. ولو ماتبين برايج.. ميعاد: شو قصدك..؟!!!!! عبدالعزيز: قصدي أبا الملجه الأسبوع الياي، وبعد شهرين أو ثلاثه بالكثير العرس.. ميعاد: ولو أنا رفضت..؟؟؟ عبدالعزيز: بدال العروس بلقى عشر.. وقام عبدالعزيز وخلى ميعاد مصدووومه من الي قاله، معقوله يتركني ويدور على غيري..!!!!!!! وفي هالوقت وصلت غاليه.. الكل قام لها يهنونها السلامه، الي تحظنها والي تبوسها والي تصيح.. غاليه: بس بس عرفتكم تحبوني.. ههههههههههه حرام اختربت حفلتي.. عبدالعزيز: تفداج يابنت عمي المهم وجودج من بينا.. أبوعبدالله: مافي شي مهم بالدنيا كثر ضحكة الحلوه غاليه.. غاليه: الله يخليك لي ياعمي.. وشافت أحمد واقف يطالعها من بعيد.. واستانست إنه يلس في بيتهم ينتظرها.. وبعد عشر دقايق قرروا كلهم يستأذنون ويخلونها ترتاح.. وسارت غاليه للباب أونها توصلهم.. ناصر: أونج يعني مؤدبه توصلينا للباب.. داخل أشوفج داخل.. غاليه: ههههههههه خلاص بسير برقد.. حتى النت مب داخلتنه.. أحمد إلي فهم عليها: أحسن لج انتي بروحج تعبانه.. ناصر: يالله بنت عمي.. تصبحين على خير.. غاليه: وإنتوا من أهل الخير.. مع السلامه.. راحت غاليه غرفتها وتسبحت عالسريع وطاحت على السرير تبا ترقد، ودخل عليها أبوها يبا يتطمن عليها قبل الرقاد.. أبوغاليه: هاا حبيبتي عساج أحسن الحين.. غاليه: الحمدلله بخير.. أممممم بابا أبوغاليه دخل الغرفه: ياروح بابا.. غاليه: أنا بخاطري أدرس إدارة أعمال بالجامعه الأمريكيه.. أبوغاليه: من عيوني ماطلبتي.. غاليه: بس ماما مب راضيه.. أبوغاليه: انتي ييبي النسبه الي ترفع راسي فوووووق، ووعد مني أقنعها لج.. غاليه: في مره بحياتي كلها خذلتك.. أو نزلت راسك.. أبوغاليه: أممممممم لا غاليه: خلاص عيل أكيييييييد برفع راسك فوووق فوووق فوووق.. أبوغاليه: إن شاءالله.. يالله حبيبتي ارقدي الحين.. تصبحين على خير.. غاليه: وانت من أهل الخير.. طلع أبوغاليه وخلى بنته ترقد.. وسار على غرفته وهو منزل راسه، وشاف حرمته يالسه ترتب الفراش للرقاد.. أم غاليه: منصور شو فيك..؟ أبوغاليه: معورني قلبي على غاليه.. أم غاليه: بسم الله عليها.. مافيها إلا العافيه.. بروحك سمعت الدكتور يقول إنها بخير.. أبوغاليه تنهد بالقوو: قلبي يافاطمه مب مطمن.. خايف والله خايف.. أم غاليه: إذكر الله يامنصور.. اصبر بييب لك ماي.. وراحت تييبه له ماي وعطته يشرب.. وهي تسمي عليه وتمسح على ظهره.. ورقد على السرير وهو مغمض عيونه، وقعدت زوجته تقرا عليه قرآن إلين هدا شوي.. أم غاليه: الحين خبرني شو الي مخوفنك.. أبوغاليه: اااااااااااااه من الي مخوفني.. الي مخوفتني هي غاليه.. دايما تقولي أبا وأبا.. أبا أدرس وأتفوق.. أبا أشتغل أبا.. أبا أتزوج.. والله تذبحني كلما قالت أبا أتزوج وأبا أربي عيالي.. وبسمي ولدي العود منصور على بابا.. مب قادر أتحمل يافاطمه.. أم غاليه بدت تصيح، وكمل أبوغاليه: من يوم شافت النور وأنا معاهد ربي إني أسعدها بكل شي.. بلبيلها كل طلباتها.. بكون لها الأم والأب والأخ الي انحرمت منه والزوج.. بس نسيت إنها في يوم بتكبر وبتكون لها احتياجاتها الخاصه.. أم غاليه: منصور شوي شوي على روحك.. كلنا سوينا الي نقدر عليها، بس مانروم نعترض على حكم الله.. أبوغاليه: فاطمه... غاليه لازم تعرف.. أم غاليه: لا.. لا يامنصور بعدها صغيره.. أبوغاليه: أي صغيره.. البنيه كبرت ومن حقها تعرف الحقيقه كلها.. فاطمه راحت بعيد عنه ويلست تصيح بصوت عالي.. أبوغاليه: يافاطمه لاتصيحين.. انتي عارفه إن هاليوم بيي.. أم غاليه: بس.... أبوغاليه: لا بس ولا شي.. بأقرب فرصه غاليه لازم تعرف.. سكتت فاطمه وهي من داخلها تصيح.. تصيح بنتها الي ماتعرف شو الغد مخبي عليها.. | |
 |
|
09-10-2008, 12:37 PM
| #24 (permalink) | |
|
عضو مجتهد
| بعد يومين في مكتب ناصر الي لاهي بالشغل وحده معصب عالموظفين، دخل عليه أحمد وهو شايل الملفات.. أحمد: ناصر بسك صراخ على هالفقارى، أي مشكله ثانيه وبيشتكون عليك عند العم منصور، وانت تعرفه ماعنده أهلي ومب أهلي.. ناصر: أحمد رجاءا.. الي فيني مكفيني اطلع برع خلني أخلص شغلي.. أحمد حز في خاطره: أفااا ياناصر.. أنا ربيعك من عمر الحين ياي تطردني لأني ابا مصلحتك.. مشكوور.. وقام أحمد يبا يظهر بس ناصر قام ومسكه من يده.. ناصر: أحمد لحظه.. سامحني ياخووي بس والله مب حاس بنفسي.. أحمد: شو الي صاير لك.. وليش كل هالحزن والضيج. ناصر: أحمد والله ما أدري.. مب قادر أكلم أي أحد، ومالي نفس على الشغل.. أحمد: إنزين ليش شو السبب..!!!!!!!!!!!! ناصر: ماأدري ماأدري.. أحمد: أوكي برايك لاترمس.. شو رايك تاخذ لك إجازه يومين، ترتاح وتسافر لك أي مكان.. ناصر: أسافر..!!! وين يعني..؟؟ أحمد: أمممممم سير البحرين صغيره وحلوه وتكفيها يومين.. ناصر: أسافر بروحي!!!!!! بضيج خلقي بزياده.. أحمد: ههههه ولايهمك أنا بسافر وياك.. بس إنت الي تقدم لنا على الإجازه... ناصر: ههههههههه أحمد.. أحمد: ياعيون أحمد.. ناصر: هههههه مالت على عيونك.. إنت حبيت بحياتك.. أحمد إرتبك: أمممممم هيه.. لا ناصر: هيه أو لأ..؟؟ شكلك تذكرت السوده الي حبيتها.. أحمد: هههههههههههههه لا.. ليش تسأل..!!! ناصر: لأن الحب يبيله تضحيه، ويوم إنك تبي السعاده لحبيبك لازم تضحي ولو على حساب قلبك.. أحمد: مب فاهم انت شو تقصد.. انت بتودر شروق..؟؟؟؟ ناصر: لالا ياأحمد شروق مالها خص بالسالفه.. أحمد: عيل شو قصدك..!! ناصر انت تحب وحده ثانيه..؟؟!!!! ناصر:...... أحمد: يعني السالفه فيها حب قديم.. انزين وليش افترقتوا..!! ناصر: لأني إرتباطي بها مستحيل.. أحمد: بعد مافهمت.. ناصر: أحمد خلاص سكر على الموضوع.. وخلني أسير آخذ لنا الإجازه وبالمره نحجز لنا التذاكر.. أحمد: أوكي، أممممممم شخبار غاليه..؟؟ ناصر: الحمدلله كله أوكي.. أحمد: هي شو عندها بالضبط.. ناصر: قلبها ضعيف من يوم صغرها.. أحمد: قلبهاااا.. بس عمرها ماقالت لي شي.. ناصر بشك: وليش تقولك..!! أحمد بإرتباك: لا بس قصدي مايبين عليها، ماشاءالله عليها فرفوشه وحبوبه.. ناصر: غاليه قويه وتتحدى الصعاب.. أحمد أنا بروح مالي خاطر أرمس في هالسالفه.. طلع ناصر.. وخلى أحمد مب لاقي لإجابته أي حلول.. | |
| |
|
09-10-2008, 12:40 PM
| #25 (permalink) | |
|
عضو مجتهد
| غاليه مع عمتها بالميجا مول يتمشون.. فجر: غاليه.. ليش أصريتي نظهر مع إنج للحين تعبانه.. غاليه: أمممممممممم مواااعده.. فجر: شـــــــــــو!!!!!!!!!! غاليه: ههههههههههه عموه أمزح وياج.. بس باجي أسبوع على الإمتحانات وحبيت آخر طلعه لي تكون مع عمتي الحلوه.. فجر: عيل وينهن ربيعاتج وبنات عمج..!!!!! غاليه: مليـــــــــت ياعموه من الطلعه وياهن.. وحبيت أغير جو مع حبيبة قلبي عمووه فجر.. فجر: إنزين وين تبينا نروح..!!! غاليه: أممممممممم أول شي بندخل السينما في فيلم يديد حق توم كروز.. فجر: تعرفيني ما أحب السينما.. غااليه: برايج بس أنا أحبها.. إنزين وبعدها بنتعشى وبنتمشى وبناكل باسكن روبنز.. فجر: من زمان ماظهرت جي.. العاده أظهر للشغل وبس.. غاليه: مع غاليه المنصوري مش حتندمي ياأفندم.. فجر: ويا راسج بسرعه جدامي.. دخلوا السينما ويلسوا يطالعون الفيلم، وفجر مب عايبنها الوضع.. فجر: كله شباب.. الله يسامحج ياغلوووي وهقتيني بهالطلعه.. غاليه وهي مندمجه فالفيلم: عموووه إطلعي وشوفي الدنيا، خلي هالشباب يشوفونج ويتخبلون عليج.. فجر: أقول مااااالت عليج، شوفي الفيلم أحسن لج.. غاليه: خخخخخخخخخ فجر ما انتبهت للفيلم كثر ما إنتبهت للريال الي يالس بعيد على يسارهم تحس إنها تعرفه، وهو يالس مع ربعه ومندمج فالفيلم، بس مب قادره تعرفه.. بس هي متأكده إنها تعرفه.. خلص الفيلم وطلعت غاليه وهي مستانسه وعايبنها الفيلم.. فجر: مااااالت عليج وعلى أفلامج.. غاليه: عموووووووووووه فجر: قومي قومي أشوفج خلينا ناكل لنا شي بموووت من اليوع.. راحوا وخذولهم من ماكدونالدز ويلسوا ياكلون، وغاليه مرتبشه توصف شعورها بالفيلم وعمتها سرحانه وتحاول تتذكر منو ممكن يكون الريال الي شافته.. غاليه: عموووه عموووه شوفي هاذاك الريال من متى يطالعج، الظاهر خلاص بتنخطبين خخخخخخخ فجر: غلووووي اوجع.. اسكتي بشوفج.. وانتبهت فجر للي تأشر عليه غاليه هو نفسه الي شافته فالسينما، شوي وقام الريال وراح لعندهم.. الريال: السلام عليكم.. فجر+غاليه: وعليكم السلام.. فجر: نعم أخوي في شي..!!! الريال: إنتي فجر صح..؟؟ فجر المنصوري!!!! غاليه استغربت وفجت حلجها وفجر أخس عنها ماتعرف هذا منو ولا كيف يعرفها.. فجر: إنت شو تبا.. وإلا هاي طريقه يديده للمغازل.. غاليه: أخوووي إنت غلطان.. ممكن تروح بدون مشاكل.. الريال: أنا مب غلطان.. فجر ماتغيرتي والي يشوفج مايقول إنج كبرتي، ولا مرت سنين على فراقنا.. فجر وقفت ويلست تتطالع الريال.. كان طويل وأسمراني وامبين عليه عمره فوق الثلاثين.. بس عيونه..!! عيونه يافجر مستحيل ماتعرفينها.. فجر حست بجسمها ياته قشعريره قووويه.. وانحبست كل الكلمات بصدرها.. معقوله إني ماعرفتك..!!! الريال: أنا علي يافجر.. علي الكعبي. غاليه وقفت هي الثانيه ويلست تتطالعه وهي منصدمه، معقوله هذا هو الريال الي كانت تحبه عمتها.. معقوله بعد كل هالسنين يرجع لدنيتج ياعمتي.. علي: فجر.. ليش ساكته، قوليلي أي شي، ريحي قلبي.. فجر يلست مكانها وهي محطيه يدها على قلبها.. وغاليه هي الي تكلمت: معقوله إنت علي.. وينك كل هالسنين..؟!!!! علي: وإنتي منو..؟؟ لايكون بنتها..!!!!!! غاليه: لا..أنا بنت أخوها منصور.. فجر: كيف ماعرفتك..؟؟؟ علي: السنين تغير.. وانتي من حقج ماتنتبهين لملامحي.. فجر: بس إنت عرفتني، وأنا الي ماعرفتك.. غاليه: لاتلومين نفسج ياعمووه.. مثل ماقالج الدنيا تغير.. بس وينك كل هالسنين وليش مارجعت لعمووه.. علي: من بعد مارفضني منصور أخوج وطردني من بيتكم، سافرت برع أكمل دراستي وأكون نفسي وأرجع أحسن من أخوج نفسه.. بس الغربه كانت صعبه ومره بعيد عن الأهل وعن الربع.. وعن القلب.. فجر: وليش مارجعت..؟؟ علي: كيف تبيني أرجع وأنا وعدتج إني اكون نفسي وأرجع آخذج.. غاليه: لاتقول بعد هالسنين كلها ماكونت نفسك.. علي: خلصت دراستي الجامعيه وأخذت الماجستير.. واشتغلت هناك في شركة وتعلمت منهم كل شي.. وبعد فترة فتحت لي شركة بروحي.. واتوسعت تجارتي والحمدلله.. فجر: الحمدلله.. علي: بس بعد فتره حسيت بإن شي ناقصني.. رجعت أحس بالغربه تذبحني.. وتذكرتج يافجر.. تذكرت حبنا وأيامنا الحلوه.. واتصلت بأمون أختي.. فجر: شخبارها أمون والله ما أعرف عنها أي شي من تزوجت.. علي: معقووووله بس......... فجر: بس شو...شو فيك..!!!!! علي: أمون قالت لي إنج إنخطبتي وكم شهر وبتتزوجين، وإنج موافقه على هالعرس ومب مغصوبه عليه.. فجر: أنااااااااااا غاليه: جذب والله جذب.. علي: بس شو مصلحتها تقص علي.. وهي تعرف اشكثر نحنا متعلقين في بعض.. فجر: يمكن.. يمكن كانت تبيك تنساني وتلتفت لمستقبلك.. علي: بذبحها والله بذبحها.. إنتي تعرفين إني بعد غربتي بخمس سنين كنت خلاص برجع.. بس قلت ليش أرجع وفجر تزوجت وأمي وأبوي ماتوا وأمون تزوجت وراحت بوظبي مع ريلها.. فيلست خمس سنين زياده.. غاليه: يعني يلست عشر سنين برع البلاد.. علي: هيه.. فجر: إنت سافرت وانا عمري 18 سنه.. ويلست هناك عشر سنين.. يعني رجعت من سنتين..!!!!!!!! علي: هيه.. بس مافكرت ولاحاولت أسأل عنج.. لأني خفت انصدم فيج وإنتي مستانسه مع ريلج وعيالج.. وأكرهج.. فجر: تكرهني..!!! علي: خفت أكرهج إلين شفتج سعيده ولاضحيتي مثل ما انا أضحي.. فجر: حرام إني ما فكرت فيوم إني أكون لغيرك.. علي: يعني إنتي ماتزوجتي ولا....... فجر: ولافكرت بغيرك.. ولاحبيت غيرك.. ولا... ولا بعمري راح آخذ غيرك... علي: فجر أنا الحين صاحب شركه ودخلي كبير.. يعني أكيد أخوج ماراح يرفضني صح..؟؟ فجر: أخوي ماعاد له دخل بحياتي.. لو تبيني بتزوجك غصبن عن الكل.. غاليه: لا ياعمتي لاتتحدين أبوي.. فجر: بتحداه ياغاليه.. بتحداه لأني تعبت من إني أسير وراه وأمشي بطوعه.. صدقيني ياغاليه محد حاسس فيني.. علي: أنا هالأسبوع بحاول اكلمه وبخطبج منه.. ولو ماوافق ساعتها بنشوف لنا طريقه ثانيه.. فجر: أنا عمري 30 سنه يعني مسؤوله عن قراراتي بنفسي.. علي: لايافجر.. أباج تطلعين من بيتج لبيتي وإنتي ملكه مثل ما إنتي ملكة قلبي.. فجر سكتت بعد هالكلام.. وبخاطرها إنها تطير مثل الطير في السما.. أخيرااا الحب بيكتمل.. والحلم بيتحقق. . وكل الأماني الي تمنتها فجر راح تصير واقع ملموس.. | |
| |
|
09-10-2008, 12:42 PM
| #26 (permalink) | |
|
عضو مجتهد
| في مشكله صايره بين عبدالعزيز وميعاد ومحد داري عنها، عبدالعزيز مصر إنه يتزوج الحين وميعاد وايد عنيده تفكر بالدراسه والشغل أكثر عن خطيبها.. وقرر أخيرا إنه يوضع النقاط على الحروف ويفاتح عمه بالسالفه.. بو حميد: خير ياعزيز شو صاير..؟؟ عبدالعزيز: عمي أنا أبا أتزوج.. بوحميد: هاذي الساعه المباركه.. وعروستك تنتظر إشاره منك.. عبدالعزيز: بس ياعمي ميعاد ماتبي تتزوج.. بوحميد: لو ماتبي الزواج ماكانت وافقت.. عبدالعزيز: لاياعمي هي موافقه بس المشكله إنها تقولي بعد ماتخلص دراستها وتشتغل.. بوحميد: شو هالرمسه بعد..!!! بتشتغل عقب العرس.. عبدالعزيز: قلتلها ياعمي.. بس هي مب مقتنعه وتقولي إنها بعدها صغيره.. بوحميد وهو معصب: شوف مسودة الويه تتحرانا يهال ونلعب وياها، والله لا أأدبها الحين.. وقف راشد يبا يسير لبنته وهو معصب وقام وراه عبدالعزيز الي يعرف عمه وااايد عصبي ومحد يقدر يهديه.. عبدالعزيز: ياعمي طول بالك، أنا خبرتك بالسالفه عسب تعرف كيف تتفاهم معاها، مب بالضرب الله يهديك.. بوحميد: عيل شو تبيني أسويلها أطبطب عليها وأقولها كفوج بنتي سوي الي براسج ونزلي راسنا بالقاع.. عبدالعزيز وهو يسحب عمه للكنبه: لا ياعمي راسك مرفوع.. بس أنا أقول لو تدق على مرتك كاتيا وتخليها تزقرها ونتفاهم هني.. مسك بوحميد التلفون ودق على مرته وقالها إتييه الميلس.. ووقف عبدالعزيز يصب القهوه لعمه الي ثارت أعصابه.. كاتيا: خير تقبرني شو بدك..؟؟ بوحميد: سيري إزقري ميعاد وتعالي إنتي وياها.. كاتيا: من عيوني ثواني بس.. راحت كاتيا وبقى عبدالعزيز واقف يقهوي عمه وهو متوتر من الي بيصير.. ويحس إنه تسرع يوم خبر عمه لأنه عصبي وصعب التفاهم وياه.. الله يستر بس.. دخلت ميعاد ووراها كاتيا سلموا ويلسوا.. وميعاد مبين عليها الخوف من أبوها.. وعبدالعزيز ما طالعها ولا إهتم لوجودها يازعم يبي يأدبها.. بوحميد: ميعاد.. هذا عبدالعزيز ياي يحدد يوم الملجه الأسبوع الياي.. شو رايج..؟؟ ميعاد:............ كاتيا: هايدي الساعه المباركه طبعا.. وميعاد........ بوحميد: إنتي إسكتي.. هااا ميعاد شو قلتي..؟؟ ميعاد: أبوووي.. أنا أنا.. احم بوحميد: ماطلبنا أغنيه طلبنا رايج بالسالفه.. ميعاد: أبوي بس أنا توني بنص الكورس وووو..... بوحميد: ماقلنا بنزوجج باجر.. كلها ملجه وبالصيف العرس.. ميعاد تجرأت أخيرا: بس أنا أبا أكمل دراستي وأشتغل.. راشد قام من مكانه وسحبها من شيلتها وصفعها كف طيحها على كاتيا.. عبدالعزيز وقف ومسك عمه.. بوحميد: يعني كلام عزيز صح يامسودة الويه.. عبدالعزيز: الله يهداك ياعمي مب جي عاد.. ميعاد: لاخله يضربني مب إنت الي طلبت منه.. بوحميد: لج عين بعد ترمسين، والله ياميعادووو ملجتج الأسبوع الياي، وبالإجازه العرس.. ولوسمعت صوتج بعد اليوم والله لا أزفج على قبرج.. ميعاد بدت تصيح بصوت عالي وعبدالعزيز عوره قلبه عليها.. عبدالعزيز: لا ياعمي أنا مب راضي على هالطريقه.. ميعاد لو إنتي موافقه قوليلي.. ولو ماتبيني إنتي حره والله إني مب جابرج علي.. بوحميد: لا ياعزيز هي موافقه غصبن عليها.. عبدالعزيز: عمي أرجوك.. أنا مب مستعد أعيش مع وحده ماتبيني.. ميعاد وقفت ويلست تتطالعه: أنا أبيك ياولد عمي.. بس بشروطي.. عرس قبل لا أخلص دراسه لا.. قام بوحميد يبا يضربها مره ثانيه بس مسكه عبدالعزيز، وفي هاللحظه دخلوا ناصر وخليفه- إخوان ميعاد- ناصر: بسم الله اشصاير هني حرب.. بوحميد: تعال اسمع أختك عسى الله ياخذها إن شاءالله.. خليفه: ميعاااد..ويهد إيهد حيلج شو مسويه بعد..؟؟ بوحميد: مسويه سواد ويه.. تقول لولد عمها...... عبدالعزيز: عمي... لو سمحت ماله داعي لكل هالرمسه.. أنا وميعاد خلاص ماعاد بينا شي.. وإذا على المهر والذهب حلال عليها.. وقبض طريجه وطلع من الباب.. ناصر لحقه على طول.. وخليفه راح لميعاد ومسكها من شعرها وظربها ولو ما مسكته كاتيا كان ذبحها.. بوحميد: شو سوينا فيج عسب تجازينا بالفضيحه.. ميعاد من الصدمه يلست تصيح وهي مب مصدقه إنه عزيز فسخ خطوبته منها.. خليفه: إنتوا الي دلعتوها يابوي.. شو سويتي الله يلعنج..؟؟؟؟؟؟ في هالوقت ناصر لحق على عزيز قبل لايركب السياره.. ناصر: عزيز وقف شوي خلنا نتفاهم.. عبدالعزيز: خلاص ياناصر ميعاد ماتبيني وأنا فسخت الخطوبه.. ناصر: ياريال هدي بالك.. وكل شي بيتصلح.. عبدالعزيز: عن إذنك عندي شغل.. وراح عبدالعزيز وخلا ناصر واقف ومب مصدق الي صار.. ورجع داخل لقى أبوه يحكي السالفه لخليفه الي كان واصل حده من القهر.. وميعاد وكاتيا مب موجودات.. ناصر: والحين يابوي شو الحل.. عزيز مب راضي يتفاهم.. خليفه: هدوني عليها وأنا الي بخليها تغير رايها.. بوحميد: لاياخليفه خلاص برايها خلها تولي.. لكن والله ثم والله لا أخليها مثل البيت الواقف وبحياتها ماراح تشوف العرس من واحد ثاني غير عبدالعزيز.. ودراستها الي متخبله عليها لو تموت ماكملتها.. ناصر: يابوي حط الرحمن بصدرك.. مهما كان هذي بنتك.. انت عطني يومين وأنا بتفاهم مع ولد عمي.. وكل شي بيمشي تمام.. طلع ناصر وراح لميعاد بس عقبها غير رايه وطلع من البيت وراح يدور على عبدالعزيز عسب يتفاهم وياه.. بس بعده ما إبتعد بعيد وشاف الي خلى كل شعره بجسمه توقف.. شاف سيارة عبدالعزيز منجلبه على الرصيف.. وعبدالعزيز طالع نص جسمه منها وتارس الشارع بالدم.. اتريونـــــــــــــــــي في جزء السادس | |
| |
|
12-10-2008, 09:42 PM
| #28 (permalink) | |
|
عضو مجتهد
| الجزء السادس في بيت منصور المنصوري.. غاليه كانت يالسه هي وعمتها يسولفون وغاليه مرتبشه لإن عمتها خلاص بتتزوج.. فجر: مب جنج متسرعه شوي.. تبين الفكه مني هااا غاليه: يالييييييييييت أفتك منج.. حشى مللتي فينا سيري تزوجي.. فجر: ههههههههههه ماعليه بنشوف منو الي بتشتاق لي عقب.. وبتيلس كل يوم تدق لي عموووه تعالي.. عموووه وحشتيني.. غاليه: ههههههههه لالا صدقيني فراقج عيد.. فجر: ماااااااالت على هالويه.. غاليه: إنزين خبريني عموووه.. أمممممممم تكلمينه.. فجر: أمممممممممممم لأ غاليه: عمــــــــــــــوه يالله حلفت عليج تخبريني.. فجر: هو صح عطاني رقمه.. بس ما أكلمه إلا للضروره.. غاليه: مثل شو يعني هالضروره..؟؟ فجر: أممممممم اشتقت لج.. وحشتيني ههههههههههههههه غاليه: والله عمووه تستعبطين اليوم.. فجر: ههههههههه لاحبيبتي أكلمه عسب يقولي متى بيي يكلم أخوي.. بس بعدني ماعطيته رقم منصور.. غاليه: يالله توعدني بهالسعاده الي عمووه فيها.. فجر: هههههههههههههههههه مااااالت.. وفي هاللحظه دخل بوغاليه، ونقزت عليه غاليه تبوسه وتحظنه بس هو شكله كان متغير ويمشي بسرعه.. غاليه: بابا شو فيك..!! فجر: خير ياخوي شو الي صار..؟؟ بوغاليه: عبدالعزيز سوا حادث ونقلوه المستشفى.. فجر: عزيز ولد أخوي.. بوغاليه: هيه.. غاليه: عسى مب متعور..؟؟ بوغاليه: ما أدري والله.. بس الي وصلني إنه ناصر وداه المستشفى بين الحياة والموت.. الله يستر الله يستر.. غاليه وفجر على طول راحوا يلبسون عبيهم وأبوغاليه راح يخبر زوجته وركضت هي الثانيه تتلبس وهي مب شايفه طريجها من الدموع.. وصلوا المستشفى ولقوه زحمه.. عائله راشد وإبراهيم ومريومه خالتهم كلهم هناك.. هذا غير ربع عبدالعزيز والناس الي كانوا بالحادث وراحوا ورا الإسعاف للمستشفى.. غاليه: ناصر طمني وقولي إنه بيقوم بالسلامه.. ناصر عطاها ظهره وحط راسه على اليدار وهو مغطي على عينه.. غاليه: ناصر الله يخليك قولي شو حالته.. على الأقل قولي بيعيش أو لأ..؟؟ ناصر: شو تبين ياغاليه أقولج.. أقولج إني شفته طايح في الشارع ولايتحرك.. وإلا أقولج إنه دمه تارس نص الشارع.. وإلا إني يوم ييت أشله حسيت بعظامه كلها متكسره حتى للأسعارف مب عارفين كيف ينقلونه.. وإلا أقولج الله يلعن ميعاد الي تسببت بكل هذا... غاليه: ميعاد...!! وميعاد شو دخلها..؟؟ ناصر بصوت عالي: غاليه روحي عني الي فيني مكفيني.. راحت غاليه وهي مب مستوعبه شو الي صاير، دورت على ميعاد ولالقتها.. ومسكت مروى أختها.. غاليه: أختج وينها.. معقوله خطيبها مسوي حادث ولاتيي تتطمن عليه.. مروى: لاتسأليني بروحي مستغربه.. يوم وصلنا الخبر طلعنا كلنا نتراكض وهي طاحت على الدري تصيح ومب راضيه تتحرك، فخلينا مرة ابوي عندها ويينا.. غاليه: عزيز كان عندكم قبل الحادث..؟؟ مروى: ما أدري.. ليش..!! غاليه راحت عنها ووقفت مع عمتها تنتظر الدكتور يظهر لهم.. بعد ساعه تقريبا طلع الدكتوره ومبين عليه التعب.. بوعبدالله: الله يخليك يادختور طمني على ولدي.. الدكتور: شو أقولك يا بويه الحاله وايد صعبه، والولد نزف وايد ونص عظامه متكسره.. بس هذا كله يتعوض.. المشكله..... بوغاليه: شو المشكله..؟؟ شو الي صار للولد..!! الدكتور: عنده ضربه وايد قويه عند العمود الفقري.. وضربه أقوي فالمخ.. المفروض ماكانوا ينقلونه هني إلا بعد الإسعافات الأوليه في مكان الحادث.. ناصر: بس هو كان وايد تعبان.. والمسعفين قالوا لو ما نقلوه الحين ب... بموت على طول.. الدكتور: أنا عارف هالشي.. وهم طاحوا بين خيارين.. يجازفون ويسعفونه ويمكن يموت أو........ بوحميد: أو شوووووو..؟؟ الدكتور وهو منزل راسه: أو ينقلونه على طول وهم يعرفون إنه راح يتشلل.. من قال الدكتور آخر كلمه طاح أبوحميد بينهم وتراكضوا كلهم عليه.. الشباب يشيلونه لغرفه قريبه.. والبنات مب عارفين شو يسوون.. غاليه راحت للغرفه الي فيها عبدالعزيز وحاولت تدخل بس منعها الدكتور.. الدكتور: ممنوع لو سمحتي.. الوضع مايسمح.. غاليه وهي تمسح دموعها: أرجووك خلني أتطمن على ولد عمي.. ياتها شروق: تعالي ياغاليه خلينا نروح.. الله يعين على الي ياي.. غاليه: شو السالفه وليش عزيز كان مسرع.. طول عمره كان هادي ولابحياته سرع.. إشمعنى اليوم.. شروق بكل قهر الدنيا: كله منها هالحيوانه الله يلعنها على الي سوته في أخوي.. غاليه: منو تقصدين..؟؟ ميعاد!! شروق: ومنو غيرها سبب عذاب أخوي.. عساها ماتتوفق لادنيا ولا آخره.. غاليه: وشو الي سوته ميعاد..؟؟ شروق: غاليه تعالي وياي بنروح لميعاد.. طلعوا البنات من المستشفى بدون لا أحد يشوفهم.. وراحوا لبيت عمهم راشد وفتحت لهم كاتيا.. كاتيا: كيفو عبدالعزيز إن شاءالله منيح هلا..؟؟ غاليه: الله يستر يامرة عمي الله يستر.. وينها ميعاد..؟؟ كاتيا: فوق بغرفتها.. بناديها لكم..!! شروق ماسوت لها سالفه ودخلت ويلست تصارخ بصوت عالي.. شروق: ميعاد الله يلعنج ويلعن اليوم الي خطبج فيه أخوي.. كاتيا: ولي شو بها..؟؟ شو صاير..؟؟ غاليه: شروق مب جي خلينا نتفاهم.. بس شروق علا صوتها أكثر: إنزلي أشوفج إنزلي.. ونزلت ميعاد تركض وهي تصرخ: عزيز فيه شي؟؟ صار له شي؟؟ شروق: الحين تتنشدين عنه..الحين تذكرتي إنه خطيبج.. وينج عنه من شهر وهو يترجاج توافقين عالعرس.. أخووي خلاص رااااح.. راح ولاعدتي بتنفعينه بشي.. كاتيا: وليه عزيز مات.. ميعاد: ماااااااااااات!!!!!!!!!!! غاليه: لالالا مب ميت بس واايد تعبان.. شروق: ياليته مات.. ياليته راح ولا إنه يعيش مشلول طول عمره.. كاتيا: تشلل..!!!! ميعاد: لا لاتقولين تشلل.. عزيز بيرجعلي.. عزيز يحبني.. شروق: حبج مرض قولي آمين.. ميعاد إنتي جرحتي أخوي جرح عمره ماراح يشفى منه.. يالله غاليه نروح.. ورجعوا البنات للمستشفى الي محد إنتبه لغيابهم.. وراحت غاليه لناصر الي يالس على الأرض وهو مصدوم وبخاطره يصيح.. غاليه: ناصر.. إذكر الله، عزيز بيقوم بالسلامه.. ناصر: بيقوم بس على كرسي.. لابيقدر يروح ولايرد.. غاليه: هذا حكم الله.. ناصر: كله منج ياميعاد.. شوفيها لو تزوجتيه.. لو كنتي وافقتي ماكان صار كل هذا.. غاليه: الي صار صار ياناصر.. وسبحانه أكيد له حكمه فهالشي.. فوض أمرك لله.. ناصر: والنعم بالله.. وصل أحمد ومسك يد ناصر ويلس يهديه، غاليه ارتاحت شوي من شافت أحمد.. وراحت لعند البنات، وشافت أمها يالسه وهي ذابحه عمرها من الصياح.. غاليه: ماما الله يهديج ليش جي تسوين بنفسج.. عزيز بيقوم بالسلامه.. أم غاليه: شو تبيني أسوي.. حرام الي صار والله حرام.. غاليه: شوفي عمتي أم عبدالله محتاجه وقفتج معاها.. فاطمه لوت على سميره حرمة أخوها والي هي أخت زوجها وراحت هي وياها في صياح ماله أول من آخر.. على الساعه عشر ونص بالليل ظهر لهم الدكتور وطلب منهم إنهم يروحون لبيوتهم لأن يلستهم هني مامنها فايده، ويخلون واحد من الشباب معاه... راحوا الإخوان كلهم مع حريمهم وعيالهم.. وبقى ناصر وأحمد وعبدالله في المستشفى ينتظرون أي خبر يطمن قلوبهم.. ناصر يلس يقرا قرآن في الإستراحه وجنبه أحمد وعبدالله حيران من الي صار.. ليش عزيز كان سايق بهالسرعه..؟؟ وشو الي مطلعنه القايله..؟؟؟ فقام ويلس حذال ناصر الي كان يقرا قرآن بصوت مسموع وصوته في رنة صياح.. عبدالله: ناصر.. الله يخليك تقولي شو الي صار.. أنا محتار من الي صار.. أحس مب لاقيله أي تفسير.. ناصر سكر القرآن: عبدالله شو تبيني أقولك.. أقولك إن أختي هي السبب في الي صار.. عبدالله: منو من إخواتك..؟؟ وشو دخلها بالسالفه.. ناصر حكى السالفه باختصار لعبدالله.. عبدالله: بس عزيز هادي بطبعه، ومب هالسالفه الي ترفع له ضغطه.. ناصر: لا ياعبدالله هالموضوع مب ولد اليوم أو أمس.. عزيز صار له أكثر من شهر وهو رايح راد على ميعاد بس هي معنده عليه.. ويوم وصل حده كلم أبوي.. والمشكله أبوي حلف إنها ماتكمل دراستها.. ولو ماخذت عزيز مابتاخذ غيره.. عبدالله سند براسه على ورا: الله يالدنيا، عزيز الي ماهزته مشاكل الدنيا وبلاوي الشغل ووفاة أغلى الناس بحياته، الحين يقوم الحب ويذبحه.. أحمد: الحب القوي الطاهر هو الي يحطم الإنسان.. ناصر قام عنهم وسار لعند غرفة عبدالعزيز يوايج عليه من الدريشه عل وعسى يحس بالدنيا ويقوم.. بس ماشي فايده، شافته النيرس وطلعت له برع.. النيرس: هو بعده مخدر.. مابيقوم الحين.. ناصر: وليش مخدرينه..؟؟ النيرس: إصاباته وايد قويه.. ولو صحى بيتألم وايد.. ناصر: تفداك روحي ياعزوز.. النيرس: أخوك..؟؟ ناصر وهو يمسح على خده: لا ولد عمي.. بس هو أغلى من الأخ.. النيرس: الله يقومه لكم بالسلامه.. أنا إسمي نجود لو تبا أي شي إطلبني وأنا بالخدمه.. ناصر ابتسم لها: ماتقصرين.. نجود: شكلكم بتقعدون هني للصبح.. فأي شي تطلبه من عيوني أنفذه لك.. ناصر: ماتقصرين يا أختي.. راحت النيرس عنه وراح هو لعند الشباب.. وكلهم أمل يطلع الفير ويقوم معاه عبدالعزيز بألف خير.. | |
| |
|
12-10-2008, 09:44 PM
| #29 (permalink) | |
|
عضو مجتهد
| باليوم الثاني الصبح وأول ماطلعت الشمس قامت أم عبدالله بسرعه تبا تروح لولدها المستشفى.. أبوعبدالله: يابنت الحلال صبري شوي.. تو الناس على الزياره.. أم عبدالله: بتوديني وإلا آخذ لي تاكسي وأروح.. أبوعبدالله: لا إله إلا الله.. خلاص الحين بنروح.. سيري شوفي منو من العيال بيروح ويانا.. راحت سميره للعيال تشوفهم وقالوا كلهم بيروحون معاهم.. وفي بيت راشد (ابوحميد) الكل قايم يتجهزون لروحة المستشفى وميعاد أولهم.. بس أبوها ماخلاها وقالها كفايه الي سوته أمس.. ميعاد: أبوي حرام عليك.. هذا ولد عمي ولازم اتطمن عليه.. أبوحميد: ماشي طلعه.. يلسي في البيت.. ميعاد: بس يابوي...... خليفه: جب يالله.. وذلفي حجرتج أشوفج.. كل الي نحن فيه بسبتج.. أبوحميد: يالله إزقر لي مروى وخلنا نروح.. كاتيا: تقبرني مروى مابدها تروح بتقعد هون مع ميعاد وأنا بروح معكم.. أبوحميد: يالله توكلنا على الله.. وفي بيت غاليه.... البيت فاضي لأن الكل راح من وقت.. في المستشفى الشباب يالسين في استراحة الرياييل ويدعون له إنه يقوم ويحس بالي حوله.. والحريم باستراحتهم.. قامت غاليه تبا تسير لغرفة عزيز تتطمن عليه وشافت ناصر وأحمد واقفين برع يشوفونه.. غاليه: السلام عليكم.. ناصر +أحمد: وعليكم السلام.. غاليه: شخباركم وشخبار عزيز.. ناصر: الحمدلله للحين ماشي أخبار.. وكل شي مستقر.. أحمد: الله يقومه بالسلامه.. غاليه: إنتوا سيروا إرقدوا سهرانين طول الليل.. ناصر: أحمد روح إنت أنا مب تعبان.. أحمد: أنا اسمحولي أخوي ينتظرني أوديه المستشفى.. وأمايه ماعندها حد يوديها العياده للتحاليل.. فبسير لهم وأول ما أخلص شغلي برجع لكم.. ناصر: يوم بتخلص من أشغالك سير إرقد.. انت تعبت ويانا وايد.. غاليه: صح كلام ناصر.. أحمد: إن شاءالله يالله بسلم على عمامي وبسير.. راح أحمد وبقت غاليه مع ناصر.. وبعد شوي رجعت لأهلها.. ناصر ظل واقف يطالع ولد عمه الي مب حاس بالدنيا ولاداري عن الي قلوبهم بتتقطع على شانه.. الله يشفيك إن شاءالله.. (( في شو سرحان)) ناصر فزعه الصوت بس ابتسم يوم شاف نجود واقفه تتطالعه وهي تبتسم له.. ناصر: لا بس يالس أقول حليله مايدري إشكثر نحنا نحاتيه وخايفين عليه.. راقد ولادريان بالدنيا.. نجود: هو صح راقد بس يحس فيكم.. ناصر: الله يشفيه يارب.. وإنتي للحين مناوبه مب المفروض تروحين البيت ترتاحين.. نجود ارتبكت: هاااه لابس ربيعتي عندها ظروف فأخذت شفتها.. ناصر: فيج الخير والله.. تدرين يانجود محد مهون علي يلستي هني غيرج إنتي.. نجود استانست: والله.. واشمعنى أنا يعني..؟؟ ناصر: ما أدري.. بس طيبتج تريح الواحد.. وأهم شي سويتيه إنج يبتيلنا أكل بنص الليل.. صراحه كنت بموت من اليوع.. نجود: ههههههههههههه أفاا عليكم إمرأة المهمات الصعبه أنا.. ناصر: هههههههههههه في هاللحظه وصلت شروق الي شافتهم يضحكون ومستانسين.. وحست بالنار تشعل بداخلها.. شروق: ضحكوني وياكم.. ناصر: هلا شروق.. ولاشي بس حليلها سهرانه ويانا طول الليل.. والحين خذت مناوبه ربيعتها.. أحسها بطيح من التعب.. نجود: لا ماعليك تراني متعوده عالسهر بالمستشفى.. شروق: ناصر إنت يالس هني تسولف مع النيرسات ومخلي أبوي وعمامي بروحهم.. ناصر: وين بروحهم الله يهداج.. الشباب كلهم هناك.. نجود: عن إذنكم.. ناصر: نجود.. نجود: نعم.. ناصر: وين الدكتور أبا أكلمه..؟؟ نجود: تعال بوديك حجرته.. ناصر: أوكي.. شروق: ناصر بتخليني بروحي..!!! ناصر: تعالي وياي أو سيري عند أهلج.. وراح ناصر مع نجود وخلى شروق تتطالعهم وهم رايحين وهي ميته من القهر.. وراحت للبنات وهي متحرقصه وتوسوس وتقول أكيد عايبتنه.. أكيد أخذ رقمها.. أكيد بينهم شي!!!!!!!!!! غاليه: شرووووووووووق شروق: هاااااااااا شو فيج.. غاليه: أنا الي شوفيني أمج من ساعه تناديج.. شروق: نعم أمايه.. مريومه: فديتج سيري خبري أبوج إني أبا أسير البيت ما أخذت دواي.. وخبريه إني برجع مره ثانيه.. شروق: إن شاءالله أمايه.. قامت شروق وسحبت وياها غاليه.. غاليه: شو بلاج تخافين تروحين بروحج شو..؟؟ شروق قالت لغاليه عن الي صار مع ناصر.. غاليه: نااااصر...!!! معقوووووله..!!! شروق: شو أسوي خبريني.. والله إني خايفه من هالنجود.. غاليه: لايكون هون ومايبيج..!! شروق: لاتقولين..؟؟ حرام والله بمووووت.. غاليه: تدرين ناصر مايخبي علي شي.. تبيني أكلمه..؟؟ شروق: والله ياليت.. بس أخافه يحس ويزعل.. غاليه: لاتخافين مابحسسه بأي شي.. رجعت غاليه لأهلها ويلسوا ينتظرون قومة عزيز.. على الظهر ياتهم النيرس نجود تبشرهم إنه عبدالعزيز قام من الرقاد.. أبوعبدالله: الله يبشرج بالخير يابنيتي والله البشاره لج، إنزين نقدر ندخل عليه.. نجود: تقدرون ياعمي بس الله يخليكم بدون إزعاج.. حاولوا لاتجهدونه وتقللون من الكلام معاه.. راحوا كلهم ودخلوا عليه ويلسوا يتحمدون له بالسلامه وهو بعده دايخ ومب مستوعب الي صاير حواليه.. أم عبدالله: يعله فيني ولافيك يالغالي.. عبدالعزيز: فالعدو إن شاءالله ياأمي.. فجر: فديتك ياولد أخوي لو تشوف الدنيا برع ماتسوى شي بدونك.. ويلسوا يسولفون وياه حوالي الربع ساعه.. وياتهم النيرس تترجاهم يطلعون وهم مب راضين.. خليفه: عشان خاطري خلينا شوي بعد.. نجود بخاطرها شو هاللزقه بعد: لا ياخوي لازم يرتاح.. والكلام يجهده.. ناصر: إنزين نقدر نزوره العصر.. نجود: أفضل إنكم تخلونه يرتاح اليوم وباجر تقدرون تزورونه.. أبوحميد: خلاص ياعيال خلونا نسير وباجر نرد له.. قاموا كلهم وطلعوا ووقف ناصر يكلم النيرس.. ناصر: عاد ما أوصيج.. ديري بالج عليه.. نجود: أفا عليك ماطلبت شي.. من عيوني الثنتين.. راح ناصر وشاف غاليه واقفه تتطالعه بنظره خبيثه.. ناصر: وليش هالنظره..؟؟ غاليه: شو السالفه..؟؟ ناصر: أي سالفه بعد..!!!! غاليه وهي تقلدهم: ما أوصيج عليه.. من عيوني الثنتين.. ناصر: ههههههههه صج إنكم يهال.. غاليه: نحن اليهال الحين وهالمغازل الي طايح به شو تسميه..؟؟ مراهقه متأخره!! ناصر: أقولج بنت عمي لاتنسين إني خااااطب.. يالله باي.. راح ناصر وطلعت وراه غاليه ولحقت بأهلها.. | |
| |
|
12-10-2008, 09:46 PM
| #30 (permalink) | |
|
عضو مجتهد
| مر أسبوع على الحادث وبدت الأمور تهدأ بكل العوايل.. صحيح إنه عزيز خلاص مابيقدر يمشي بعد اليوم بس هو إنسان مؤمن ومتفائل بالحياة، ويعرف إنه الي صار له إبتلاء من رب العالمين وهو بيصبر على الي صار.. بس طلب منهم إن ميعاد ماتزوره ولايبيها تشوفه أبدااااا.. وحاولوا ميت مره إنهم يقنعونه بإنه يقابلها ويتفاهمون بس هو مب راضي.. وفي يوم كان ناصر وأحمد وخليفه يالسين وياه وينكتون عليه ويضحكون.. دخلت عليهم أم عبدالله.. أم عبدالله: حبيبي لاتضحك وايد أخافك تتعب.. ناصر: هههههه عمتي الله يهداج شو الي بتعبه فالضحك.. وبعدين انتي سيري البيت نحنا الشباب بنهتم فيه.. أم عبدالله: لافديتك ولدي وغالي علي.. انتوا بسألكم شو الي أكله من وصلتوا هني..؟؟ خليفه: صراحه ولاحتى ماي.. هههههههههههه أم عبدالله: وتبوني أخليه وياكم.. عز الله شفى وليدي.. ناصر: ههههههههههه خلاص بنهتم فيه.. المهم راحته الغالي.. أم عبدالله: وبعدين أنا بروح الظهر برتاح وبشوف إبراهيم وبرد له العصر.. أحمد: وأنا بعد بروح بسير بودي حمدان أخوي النادي الصحي.. ناصر: تعال بتخبرك هو أخوك مولود معاق.. أحمد: لا والله.. بس أمايه كانت مريضه من بعد ولادته ومب مهتمه فيه وايد.. ومحد اهتم بتطعيمه ضد شلل الأطفال.. وصار الي صار.. أم عبدالله: فديته.. يعلني أفداه.. جم عمره..؟؟ أحمد: عمره سبع سنين.. أم عبدالله: ربي يحفظه لكم.. يالله عيل منو فيكم بيوصلني.. أحمد: أنا الي بوصلج خالوه.. ناصر: لا والله لاتعب روحك.. نحن بنوصلها.. أحمد: أفااا عليك ترانا إخوان.. وبعدين إنتوا خلكم مع عزيز يمكن يحتاي شي.. يالله خالتي سرينا.. ناصر تمدد على السرير الثاني يريح شوي.. وخليفه طلع يغصص بالنيرسات.. وعزيز سرحان بعالمه الخاص.. عبدالعزيز: ناصر.. طلبتك..!!! ناصر: تم.. آمر تدلل يالغالي.. عبدالعزيز: أممممممم أبا أكلم عمتي فجر.. ناصر: عمتي كل يوم هني.. كلمها، وإلا تبيني أدق لها الحين..؟؟ عبدالعزيز: لا ياناصر أقصد بخاطري أكلمها بروحنا هني ومحد يخرب علينا.. ناصر: أممممممم بنخليها تييك الظهر.. عبدالعزيز: مب ممنوعه الزياره..؟؟ ناصر بخبث: أفااااا عليك عندي واسطه قويه.. وفي هاللحظه دخلت نجود تقيس له الضغط وشافت ناصر متمدد على السرير فحطت يدها على قلبها وتمت تتطالعه، حركتها كانت مكشوفه حتى عزيز إنتبه لها.. وناصر انحرج شوي.. نجود بإرتباك: ممكن أقيس لك ضغطك والحراره..!! عبدالعزيز بخبث: أنا إلا ناصر.. نجود ماتت على عمرها من المستحى وناصر اعتدل ويلس وهو حاس بالفشله.. تجدمت نجود وبدت تقيس له الضغط.. ناصر: نجود الين متى مناوبتج..؟؟ نجود: إلين المغرب ليش تبا شي..؟؟ ناصر: الصراحه هيه.. أباج في خدمه خاصه.. نجود: آمرني.. ناصر: مايامر عليج عدو.. بصراحه نبي عمتي بموضوع ضروري وهي بتيي الظهر ونبيج تدخلينها.. نجود: أهااا تبوني مصلحه يعني.. ناصر: هههههههههه أفااا عليج إنتي الخير والبركه.. نجود: ولا يهمك بس هي أي وحده فيهم..؟؟؟ ناصر: عمتي فجر طويله و....... نجود: فجر..؟؟ خلاص عرفتها هي دايما تسولف وياي وايد حبوبه ماشاءالله عليها.. عبدالعزيز: ترانا ظاهرين عليها بالطيبه.. نجود: هيه طبعا.. خلاص يوم بتوصل خلها تتصل بي وهذا رقمي.. وكتبت رقمها على ورقه عندها وعطتها لناصر وظهرت.. عزيز يلس يطالع ناصر وهو مستغرب.. وناصر بروحه متفاجئ من تصرفها، يعني هو صح يسولف وياها وفري بس إنها تعطيه الرقم وايد قويه.. عزيز: شو السالفه..!!!! ناصر: ما أدري.. بس لانظلم البنت يمكن مب قصدها.. عزيز: الحين دق لفجر وخبرها.. وخلها تظهر من دوامها وتيي عندي على طول.. ناصر دق على فجر وخبرها بالسالفه وعطاها الرقم، وقالت لهم إنها عالساعه 2 ونص بتكون عندهم.. وعلى الساعه 2 ونص بالضبط فجر وصلت المستشفى ودقت لنجود الي طلعت لها ودخلتها بعد محايل مع السيكيوريتي.. ووصلتها للغرفه ودخلت معاها.. نجود: وهاذي الأمانه وصلتها لكم.. ناصر: الحمدلله ماصادتج الشرطه.. فجر: هههههههههه أفا عليك في حماية القوات الكبرى.. نجود: هههههههههه خلاص عيل أخليكم على راحتكم.. عزيز: لو ماعليج أمر تاخذين ناصر وياج.. أبي عمتي بكلمة راس.. ناصر: أفااااااا وانا مسويلك واسطه ومدخل عمووه بالدس هذا جزاتي.. تعاقبني وتنفيني.. نجود: الله يسامحك يعني أنا عقاب..!! ناصر: لالا مب قصدي.. بالعكس.. نجود: خلاص عيل قم بعزمك على كوب شاي.. قام ناصر وطلع مع نجود وفجر تتطالعهم.. فجر: تحس السالفه فيها إن..؟؟ عبدالعزيز: تبين الصراحه هيه.. بس يوم أسأله يقولي مافي شي.. فجر: ما أدري بس هو خاطب شروق.. معقوله يكون يلعب..!! عبدالعزيز: الله أعلم.. المهم!! فجر: هيه صح.. خبرني شو صاير..!! رمسها عزيز عن كل السالفه ومشاعره وميعاد وكل شي.. فجر: إنزين هذا كله أنا عرفته يوم إنك طحت مريض.. والي إنت ماتعرفه إنه عمي حابس ميعاد في البيت وحالف إنها ماتطلعه منه إلا لقبرها، ويقول خل دراستها الي سوت فيك هالشي تنفعها.. عبدالعزيز: حرام ليش جي يسوي عمي.. المهم فجر.. أنا الي أبيه منج إنج تقولين لميعاد إني مسامحنها ومب شايل في خاطري عليها أي شي.. فجر: بس أنا يوم زرتها آخر مره كانت وايد تعبانه.. وشكلها خلاص منهاره.. عبدالعزيز: خليها برايها هي الي يابته لنفسها.. فجر: المهم الحين تراني يوعانه شي غدا وإلا أروح.. عبدالعزيز: أفااا عليج عندنا واااسطه عووده.. والله ساعات لو نص الليل ناصر يشتهي ياكل شي ست الحسن نجود على طوووول تييبه له.. ههههههههههه قام يراهق على تالي العمر.. فجر: هههههههههه صدقني السالفه فيها إن.. بس حرام شروق شو ذنبها.. الله يصلح حالهم يارب.. ودق تلفون فجر وشافت رقم علي وماقدرت تخفي ملامح الفرح الي بانت عليها.. عبدالعزيز: عمووووه شو السالفه، من منو هالتلفون..؟؟ فجر: لا ربيعتي.. أنا شوي وبرجع.. وطلعت برع تكلم علي وخلصت المكالمه بسرعه.. ورجعت لعزيز وشافته يرمس فالموبايل وميت من الضحك وسكر يوم دشت.. فجر: منو وياك..؟؟ عبدالعزيز: هذا ناصر قال لنجود تييب لج غدا الفقيره نقزت تنفذ أوامره، صدقيني تحبه.. فجر: من ناحيتها أكيد تحبه، لكن هو شو شعوره..!!!! دخل ناصر في هاللحظه وهو يطالعهم هم الإثنين وشكله معصب.. عبدالعزيز: بسم الله شوفيك معصب..؟؟ ناصر: إنتوا ماتشوفون إثنين مع معض إلا وقلتوا حب.. شوفيها لو كانت صداقه بريئه..!! فجر: إنت ممكن.. لكن هي لأ.. ناصر: حرام عليج والله إنها على نياتها.. عبدالعزيز: الأيام بيننا ولكل مجتهد نصيب.. ناصر: إنصبوا عليك كمين قول آمين.. وراح إنسدح على السرير جنب عمته وحط راسه على ريلها.. ويلس يلعب بشعرها الي كانت فاتحتنه.. شعر فجر طوييييل وناااعم.. دخلت نجود ويلست تتطالع فجر: ماشاءالله شعرج حلوو.. فجر: تسلمين.. من خلصت الجامعه ماقصيته غير 2سم كل شهرين.. نجود: تفضلي هذا الغدا.. وسامحينا عالأكل، تدرين أكل المسشفيات مايشبع.. فجر: أفا عليج لو ماشبعت باكل نصووور.. نجود: هههههههههههههههه ناصر: بسم الله علي تبا تاكلني بعد.. وإنتي تضحكين وياها بعد.. فجر: خل البنيه تضحك على راحتها، وإنت خوز عن ريولي خلني أقوم آكل.. ناصر قام وتسند على السرير ويلس يطالع نجود الي استحت من نظراته بس ماقدرت إلا إنها تتطالعه بكل حب.. وهو ماقدر يرفع عينه عنها، في عينها شي غريب يجذبه.. بس لافجر ولا عزيز إنتبهوا لهم.. عبدالعزيز: تدرين عمووه شو بخاطري.. فجر: شو حبيبي..!! عبدالعزيز: أسافر إيطاليا.. ناصر: لاتسمعك غاليه وتتخبل علينا.. تموت على إيطاليا، وعلى قولتها شهر عسلي بيكون في بلد الحب والرومانسيه.. فجر: بتقوم بالسلامه وبتسافر إن شاءالله.. عبدالعزيز: أمممممممم شو رايج نسافر هالصيف أنا وإنتي بس.. فجر: والله.. ياليت الصراحه- وتذكرت علي- بس.. لو ماصار شي يغير مخططاتنا.. ناصر: شي مثل شو..؟؟ فجر: شو دراني الظروف وايده ويمكن يصير شي.. نجود: عن إذنكم بسير بشوف شغلي.. فجر: إيلسي زين وين بتسيرين..!! خلينا نسولف.. وبعدين الحين الظهر وماشي شغل.. نجود: إن شاءالله.. ويلست معاهم وهي متشققه من الوناسه.. ناصر ينكت وعزيز ميت من الضحك.. وفجر مب قادره تاكل من الضحك.. ومر الوقت بدون لايحسون.. وما إنتبهوا إلا بأبو وأم عبدالله وهم داخلين عليهم.. أبوعبدالله+أم عبدالله: السلام عليكم.. الكل: وعليكم السلام.. نجود: عيل أنا اسمحولي بظهر عنكم.. أبوعبدالله: على وين يابنتي..!!!! نجود: سلامتك ياعمي بس بسير بشوف شغلي.. اخاف الدكتور يعصب علي.. أم عبدالله: عاد إنتي صرتي منا وفينا ونبي نشوفج كل يوم.. نجود: إن شاءالله يقوم عبدالعزيز بالسلامه ولابتحتاجون لشوفتي.. جر: أفااا عليج يانجود تراج إستويتي ربيعتنا.. نجود: على خير إن شاءالله يالله اسمحولي.. أبوعبدالله: لحظه بنيتي.. وطلع من مخباته شيك وعطاه حقها.. نجود: عمي شو هذا..؟؟!!!! أبوعبدالله: هذا بشارتج.. يوم بشرتيني بقومة ولدي.. نجود: عمي والله ماله داعي.. ومعرفتكم أكبر بشاره لي.. ناصر: نجود خذيها عمي يوم يعطي، يعطي بكرم وعاد لا أوصيج النص بالنص.. نجود: لا مب عاطيتك شي.. ناصر: أفاااا احترق ويهي.. الكل ضحك عليه.. ونجود خذت الشيك وظهرت عنهم.. وراحت لغرفة النيرسات وهي مستانسه إنها تقربت من هالعيله.. بس شهقت بقووو يوم شافت المبلغ الي في الشيك، أبوعبدالله كان كاتب لها 10,000 درهم.. | |
| |
| |
| الذين يشاهدون محتوى الموضوع الآن : 2 ( الأعضاء 0 والزوار 2) |
|---|
| أدوات الموضوع | |
| |
